नेपाली चलचित्र क्षेत्रका दिग्गज अभिनेता सुनिल थापाको असामयिक निधनप्रति गहिरो दुःख व्यक्त गर्दै अध्यक्ष कृष्ण मल्लको अध्यक्षतामा बसेको नेपाल फिल्म सोसाइटी, अभियान तथा ग्लोबल नेपाली फिल्म अवार्ड एलएलसी को संयुक्त बैठकले उहाँको सम्मानमा विभिन्न महत्वपूर्ण निर्णयहरू सार्वजनिक गरेको छ। अध्यक्ष कृष्ण मल्लद्वारा जारी प्रेस विज्ञप्तिमा स्वर्गीय सुनिल थापाले नेपाली चलचित्र क्षेत्रमा पुर्‍याउनु भएको अतुलनीय योगदानप्रति उच्च सम्मान व्यक्त गरिएको छ।

बैठकले अभियान संस्थाको तर्फबाट स्वर्गीय सुनिल थापालाई मरणोपरान्त “अभियान रत्न सम्मान” प्रदान गर्ने निर्णय गरेको छ। त्यसैगरी आगामी ग्लोबल नेपाली फिल्म अवार्ड समारोहमा उहाँलाई “ग्लोबल दीर्घ साधना सम्मान” प्रदान गरिने निर्णय भएको छ। साथै, आगामी वर्षहरूदेखि प्रत्येक ग्लोबल नेपाली फिल्म अवार्ड समारोहमा विशिष्ट चलचित्रकर्मीलाई प्रदान गरिने नयाँ सम्मानलाई “सुनिल थापा स्मृति सम्मान” नामकरण गर्ने निर्णयसमेत गरिएको छ। यी निर्णयहरू उहाँको स्मृतिलाई सदा अमर राख्ने उद्देश्यले गरिएको जनाइएको छ।

सुनिल थापा नेपाली सिने जगतमा बलियो व्यक्तित्व, गहिरो आवाज र प्रभावशाली अभिनयका लागि परिचित हुनुहुन्थ्यो। उहाँले अभिनय गरेका चलचित्रहरुले उहाँलाई नेपाली फिल्म क्षेत्रमा विशिष्ट पहिचान दिलाएको मानिन्छ। उहाँले सयौं चलचित्रमा अभिनय गर्दै विशेषगरी खलनायक भूमिकामा अद्वितीय छाप छोड्नुभयो। खलनायक मात्र नभई चरित्र अभिनेता र सकारात्मक भूमिकामा समेत उहाँले आफ्नो क्षमता प्रमाणित गर्नुभएको थियो।

चार दशकभन्दा लामो अभिनय यात्रामा उहाँले नेपाली चलचित्र उद्योगको स्वर्णिम कालदेखि आधुनिक डिजिटल युगसम्म निरन्तर सक्रिय भूमिका निर्वाह गर्नुभयो। अनुशासन, पेशागत निष्ठा र समर्पणका कारण उहाँ नयाँ पुस्ताका कलाकारहरूका लागि प्रेरणाको स्रोत बन्नुभयो।

उहाँले विभिन्न राष्ट्रिय तथा अन्तर्राष्ट्रिय चलचित्र महोत्सवहरूमा सहभागी भई नेपाली चलचित्र क्षेत्रको प्रतिनिधित्व गर्नुभएको थियो। समय–समयमा विभिन्न संघसंस्थाबाट सम्मानित हुनुभएका सुनिल थापाको योगदान नेपाली चलचित्र इतिहासमा सदैव स्मरणीय रहने विश्वास व्यक्त गरिएको छ।

उहाँको निधनले नेपाली कला क्षेत्रले एक युगान्तकारी कलाकार गुमाएको छ। नेपाल फिल्म सोसाइटी, अभियान तथा ग्लोबल नेपाली फिल्म अवार्ड एलएलसीले उहाँको योगदानलाई सदा सम्मानपूर्वक स्मरण गरिरहने प्रतिबद्धता व्यक्त गरेका छन्। स्वर्गीय सुनिल थापाको आत्माको चिरशान्तिको कामना गर्दै सम्पूर्ण चलचित्रकर्मी तथा शुभेच्छुकहरूले हार्दिक श्रद्धाञ्जली अर्पण गरेका छन्।