काठमाडौँ । राष्ट्रिय स्वतन्त्र पार्टी (रास्वपा)का सभापति रवि लामिछानेले थुनामुक्त भए पनि न्यायको लडाइँ अझै बाँकी रहेको बताएका छन्। जिल्ला अदालत रुपन्देही, भैरहवामा उपस्थित भई कानुनी प्रक्रिया पूरा गरेपछि रिहा हुँदै उनले यो लडाइँ व्यक्तिगत नभई देश र न्यायका लागि भएको स्पष्ट पारेका हुन्। जिल्ला अदालत रुपन्देहीले अदालतसमक्ष उपस्थित गराउन प्रहरीलाई आग्रह गरेपछि लामिछाने भैरहवा पुगेका थिए। उनले तीन करोड ७४ लाख ८४ हजार रुपैयाँ बराबरको बैंक जमानत बुझाएर रिहा भएका हुन्। कानुनी प्रक्रिया पूरा भइरहँदा अदालत परिसरबाहिर रास्वपाका समर्थकहरूले रविको समर्थनमा प्रदर्शन समेत गरेका थिए।

लामिछाने आज (पुस ४) बिहान पौने ८ बजे त्रिभुवन अन्तर्राष्ट्रिय विमानस्थलबाट भैरहवा आउने तयारीमा थिए। तर, गौतमबुद्ध अन्तर्राष्ट्रिय विमानस्थलमा भिजिबिलिटी कम भएका कारण उडान रद्द भएपछि उनी भरतपुरसम्म विमानमार्फत पुगे र त्यहाँबाट गाडीमा रुपन्देही आएका थिए। उनलाई नेपाल प्रहरीको रोहबरमा भैरहवा ल्याइएको हो। बुटवलस्थित सुप्रिम सहकारी ठगी प्रकरणमा बिहीबार (पुस ३) उच्च अदालत तुलसीपुरको बुटवल इजलासका न्यायाधीशद्वय वासुदेव आचार्य र तेजनारायण पौडेलको इजलासले लामिछानेलाई थुनामुक्त गर्न आदेश दिएको थियो। सो आदेशपछि आवश्यक कागजी प्रक्रिया पूरा गर्न उनी शुक्रबार जिल्ला अदालत रुपन्देही पुगेका हुन्।

रिहाइपछि सञ्चारकर्मीसँग कुरा गर्दै लामिछानेले न्यायको लडाइँ अझै समाप्त नभएको बताए। “न्यायको यो लडाइँ मेरो बाँकी नै छ। मैले अझ धेरै लड्नु छ र अहिले लड्नु पर्छ,” उनले भने, “यो लडाइँ मेरा लागि मात्र होइन, तपाईंहरू सबैका लागि र यो देशको न्यायका लागि हो।”

उनले पुराना राजनीतिक दलहरूले आफूमाथि मात्र नभई सिंगो देशमाथि अन्याय गरेको आरोप लगाउँदै त्यसको हिसाबकिताब गर्न बाँकी रहेको बताए। “देशमाथि भएको अन्यायको अगाडि ममाथि भएको अन्याय केही पनि होइन,” उनले भने, “त्यो सबैको हिसाब मिलाउन बाँकी छ। त्यो दिन आएपछि विस्तारमा बोल्नेछु।”

यसैबीच, राष्ट्रिय स्वतन्त्र पार्टीका उपाध्यक्ष डा. स्वर्णिम वाग्लेले रवि लामिछानेमाथि प्रतिशोध साँधिएको दाबी गरेका छन्। शुक्रबार आयोजित कार्यक्रममा बोल्दै उनले पुराना राजनीतिक दल र प्रवृत्तिका विरुद्ध खुलेर बोलेकै कारण रविमाथि प्रतिशोध साँधिएको प्रमाणित हुँदै गएको बताए। “रास्वपा सभापतिले देखाएको साहस आम युवाका लागि अनुकरणीय छ,” वाग्लेले भने।

उनले युवा शक्तिलाई उत्पादनमा जोड्नुपर्नेमा उल्टै विदेशिन बाध्य बनाइएको वर्तमान अवस्थाप्रति आलोचना गर्दै रास्वपाले प्रवासमा रहेका युवासँग भएको पुँजी, सीप र दक्षतालाई स्वदेशमै उपयोग गर्ने गरी ठोस योजना अगाडि बढाउने प्रतिबद्धता व्यक्त गरे।