सौर्य विकिरणले विमानको अनबोर्ड कम्प्युटरमा असर पार्न सक्छ भन्ने चेतावनीपछि केही समयका लागि ग्राउण्ड गरिएका हजारौँ एयरबस विमानहरू फेरि सामान्य रूपमा उडानमा फर्किन थालेका छन्।  फ्रान्सस्थित एयरोस्पेस कम्पनी एयरबसले करिब ६,००० वटा A320 विमान प्रभावित भएको बताउँदै अधिकांशमा छिटो सॉफ्टवेयर अपडेट आवश्यक परेको जनाएको छ। करिब ९०० पुराना विमानहरूमा भने नयाँ कम्प्युटर नै जडान गर्नुपर्ने भएको छ। फ्रान्सका यातायात मन्त्री फिलिप टाबारोटले शनिबारसम्म ५,००० भन्दा बढी विमानमा अपडेट “सुगमता पूर्वक” सम्पन्न भएको र सयभन्दा कम विमानमा मात्र अपडेट गर्न बाँकी रहेको बताए।

एयरबसका मुख्य कार्यकारी गिलॉम फोरीले “लोजिस्टिक चुनौती र ढिलाइ” का लागि क्षमायाचना गर्दै, आवश्यक अपडेट “यथासम्भव चाँडो” पूरा गर्न टोली काममा खटिएको बताए। शनिबार बिहान पेरिसको चार्ल्स दे गोल विमानस्थलमा एयर फ्रान्सका केही उडानहरू ढिलाइ वा रद्द भएका थिए। अमेरिकन एयरलाइन्सले पनि सञ्चालनमा केही ढिलाइ हुने आशंका व्यक्त गर्‍यो, तर अधिकांश अपडेट शनिबारभित्रै पूरा हुने जनायो। डेल्टा एयरलाइन्सले आफ्नो सञ्चालनमा “सीमित असर” मात्र पर्ने प्रतिक्रिया दियो।

यतिवेला बेलायतमा सिभिल एभिएसन अथोरिटीले रातभर काम गरेर एयरलाइन्सहरूले सॉफ्टवेयर अपडेट पूरा गरेको र हवाई ट्राफिकमा ठूलो प्रभाव नपरेको बतायो। ग्याटविक विमानस्थलले “केही अवरोध” भएको जनायो भने हिथ्रोले कुनै उडान रद्द नभएको जानकारी दियो। म्यान्चेस्टर र लुटन विमानस्थलहरूले पनि प्रभाव न्यून रहने बताए।

ब्रिटिस एयरवेज र एअर इन्डिया भने यस समस्याबाट ठूलो प्रभावित नभएको बुझिएको छ।

इजीजेटले आफ्ना धेरै विमानमा अपडेट पूरा गरेर शनिबारदेखि सामान्य रूपमा उडान सञ्चालन गरिरहेको जनाएको छ। विज एयरले पनि रातभरिको अपडेटपछि नियमित उडान सञ्चालन गरिरहेको छ।

अष्ट्रेलियाली बजेट एअरलाइन जेटस्टारले ९० उडान रद्द गर्नुपरेको भए पनि अधिकांश विमानमा अपडेट भइसकेको र सप्ताहन्तसम्म केही असर देखिन सक्ने जनाएको छ। एअर न्युजिल्यान्डले आफ्ना A320 विमान ग्राउण्ड गरे पनि अपडेट पूरा भएपछि सबै उडान पुनः सुरु भएका छन्।

यो समस्या एयरबसले अक्टोबरमा JetBlue Airways को अमेरिका–मेक्सिको उडानमा अकस्मात् उचाइ घटेर आपतकालीन अवतरण हुँदा कम्तीमा १५ जना घाइते भएको घटनापछि पत्ता लगाएको हो। अनुसन्धानपछि विमानको उचाइ मापन गर्ने कम्प्युटिङ सफ्टवेयर उच्च वायुमण्डलीय क्षेत्रमा सूर्यबाट आउने तीव्र विकिरणले बिग्रन सक्ने पुष्टि भएको थियो।

A320 सहित कम्पनीका A318, A319 र A321 मोडेल पनि प्रभावित भएका छन्। नयाँ कम्प्युटर आवश्यक परेका पुराना विमान भने अहिले पनि ग्राउण्डेड अवस्थामा छन्, र नयाँ उपकरण उपलब्धताअनुसार मात्रै ती पुनः सेवामा फर्किनेछन्।