शेयर बजारमा आएको अप्रत्याशित गिरावटपछि सरकारले पुँजीबजार स्थायित्वका लागि कार्यदल गठन गरेको छ। शुक्रवार अर्थमन्त्री रामेश्वर खनालको अध्यक्षतामा बसेको मन्त्रीस्तरीय बैठकले चार सदस्यीय कार्यदल बनाउने निर्णय गरेको हो। कार्यदलको संयोजक नेपाल धितोपत्र बोर्डका कायम मुकायम कार्यकारी निर्देशक रुपेश केसीलाई तोकिएको छ। सदस्यमा नेपाल राष्ट्र बैंकका निर्देशक शरण अधिकारी, नेपाल स्टक एक्सचेञ्ज (नेप्से) का कार्यवाहक कार्यकारी निर्देशक निरञ्जन फुँयाल र अर्थमन्त्रालयका उपसचिव शरद निरौला छन्। निरौलालाई सदस्य–सचिवको जिम्मेवारी दिइएको छ।
अर्थ मन्त्रालयका सहसचिव तथा प्रवक्ता टंकप्रसाद पाण्डेयका अनुसार कार्यदललाई पाँच दिनभित्र ठोस कार्यान्वयन योजना सहितको प्रतिवेदन पेश गर्न निर्देशन दिइएको छ। उनले भने, “पुँजीबजारमा देखिएका विसङ्गति अध्ययन गरी लगानीकर्ताको मनोबल उच्च राख्न प्रणालीगत र प्रक्रियागत सुधारका उपायसहितको सुझाव कार्यदलले ल्याउनेछ।”
जेन–जी आन्दोलनपछि पहिलोपटक खुलेको शेयर बजार बिहीवार लगातार तीनपटक सर्किट ब्रेक लागेपछि बन्द भएको थियो। बजार खुलेको दुई मिनेटमै ४ प्रतिशतले परिसूचक घटेपछि पहिलोपटक नेगेटिभ सर्किट ब्रेक लाग्यो र २० मिनेटका लागि कारोबार रोकियो। ११:२२ बजे पुनः खुलेको कारोबार एक मिनेट नपुग्दै दोस्रो सर्किट ब्रेक लाग्यो। सो बेला २८ करोड ७५ लाख रुपैयाँ बराबरको कारोबार भइसकेको थियो। परिसूचक १३३.६१ अंकले घटेर २५३८.६३ बिन्दुमा झरेको थियो।
दोस्रो सर्किट ब्रेकपछि बजार ४० मिनेटका लागि बन्द रह्यो। १२:४० बजे तेस्रो पटक खुलेको बजार पुनः १ प्रतिशतले ऋणात्मक वृद्धि देखिएपछि समग्र नेप्से परिसूचक ६ प्रतिशतले ओरालो लाग्यो र दिनभरको कारोबार बन्द गर्नुपर्यो। सबैभन्दा धेरै गिरावट व्यापार समूहको सूचकमा देखिएपछि अर्थमन्त्री खनालले तत्काल कदम चाल्नुपर्ने निष्कर्ष निकालेको मन्त्रालयले जनाएको छ।
(१० भाषामा अमेरिकाबाट प्रकाशित, निष्पक्ष, स्वतन्त्र, संसारका १७५ भन्दा बढी देशमा पढिने पत्रिका) Old Archive > 
प्रतिक्रिया