विजयादशमी २०८३ को टीकाको साइत सार्वजनिक, काठमाडौंमा कात्तिक ४ गते बिहान १०:२६ बजे उत्तम

काठमाडौं । नेपाल पञ्चाङ्ग निर्णायक समितिले डिल्लीबजार काठमाडौंले विजयादशमी २०८३ अर्थात् सन् २०२६ का लागि नेपालसहित विश्वका विभिन्न देश र सहरमा टीका लगाउने शुभ साइत सार्वजनिक गरेको छ।

समितिले जारी गरेको प्रेस विज्ञप्तिअनुसार २०८३ असोज २० गते बसेको बैठकले विभिन्न देशमा बसोबास गर्ने सनातन धर्मावलम्बीहरूको सुविधालाई ध्यानमा राख्दै स्थानीय समयअनुसार विजयादशमीको टीकाको शुभ साइत निर्धारण गरेको हो। समितिले तिथ्यादिको स्थानीय मानअनुसार पर्व मनाउनुपर्ने शास्त्रीय मान्यता रहेकाले देश र सहरअनुसार फरक फरक समय तय गरिएको जनाएको छ।

नेपालका लागि विजयादशमीको टीकाको शुभ साइत २०८३ कात्तिक ४ गते बिहान १० बजेर २६ मिनेट तोकिएको छ। भारतको नयाँदिल्लीमा २१ अक्टोबर २०२६ बिहान ९ बजेर ११ मिनेट तथा भुटानको थिम्पुमा सोही दिन बिहान १० बजेर १४ मिनेटलाई उपयुक्त समय निर्धारण गरिएको छ।

अमेरिकाका विभिन्न स्थानका लागि अक्टोबर २० तारिखमै टीकाको साइत परेको छ। न्यूयोर्कमा बिहान १०:११ बजे, फ्र्याङ्कफर्ट, केन्टकीमा १०:४७ बजे, बोवेन्सबोरो, केन्टकीमा ११:४५ बजे, टेक्सासमा १०:२७ बजे, वासिङ्टन डीसीमा १०:२१ बजे र क्यालिफोर्नियामा बिहान ९:५१ बजे टीकाको शुभ समय निर्धारण गरिएको छ।

क्यानडाको टोरन्टोमा अक्टोबर २० बिहान १०:४१ बजे र भ्यानकुभरमा १०:५५ बजे टीका लगाउन शुभ मानिएको छ। जापानको टोकियोमा अक्टोबर २१ बिहान १०:१७ बजे शुभ साइत तोकिएको छ।

अस्ट्रेलियाका विभिन्न सहरका लागि अक्टोबर २१ तारिखको समय निर्धारण गरिएको छ। सिड्नीमा बिहान ९:२१ बजे, मेलबर्नमा ९:३० बजे, ब्रिस्बेनमा ८:२५ बजे, एडिलेडमा ९:१५ बजे, क्यानबेरामा ९:०७ बजे, तास्मानियामा ८:५५ बजे, पर्थमा ८:४५ बजे र डार्विनमा ९:३१ बजे टीकाको साइत रहेको विज्ञप्तिमा उल्लेख छ।

न्युजिल्यान्डको वेलिङ्टनमा अक्टोबर २१ बिहान ९:२३ बजे, पोर्चुगलको लिस्बनमा अक्टोबर २० बिहान ९:४१ बजे, बेलायतको लन्डनमा १०:५५ बजे, फ्रान्सको पेरिसमा ११:३१ बजे र नर्वेको ओस्लोमा ११:५० बजे टीकाको शुभ समय निर्धारण गरिएको छ।

त्यस्तै मलेसियाको क्वालालम्पुरमा अक्टोबर २१ बिहान १०:४७ बजे, संयुक्त अरब इमिरेट्सको अबुधाबीमा १०:३१ बजे, कतारको दोहामा ९:४१ बजे, थाइल्यान्डको बैंककमा १०:०७ बजे, दक्षिण कोरियाको सियोलमा ११:१३ बजे, इजरायलको तेल अभिभमा अक्टोबर २० बिहान ११:१३ बजे, सिंगापुरमा अक्टोबर २१ बिहान १०:३१ बजे, हङकङमा १०:२७ बजे, साउदी अरेबियामा १०:०१ बजे, म्यानमारको याङ्गुनमा ९:५७ बजे र स्विट्जरल्यान्डको जेनेभामा अक्टोबर २० बिहान १०:३१ बजे शुभ साइत निर्धारण गरिएको छ।

समितिले सार्वजनिक गरेको समय टीकाका लागि सबैभन्दा उपयुक्त शुभ साइतका रूपमा निर्धारण गरिएको स्पष्ट पारेको छ। साथै दशैंको टीका शुभ साइतमै मात्र लगाउनुपर्ने बाध्यता नरहेको र उक्त दिन आफ्नो अनुकूल समयमा पनि टीका लगाउन सकिने जनाएको छ।

नेपाल पञ्चाङ्ग निर्णायक समितिका अध्यक्ष प्रा. डा. माधव भट्टराई र सदस्य सचिव श्री श्रीकेश कौशिकद्वारा हस्ताक्षरित विज्ञप्तिमा विश्वका विभिन्न मुलुकमा रहेका नेपाली तथा सनातन धर्मावलम्बीहरूलाई विजयादशमी २०८३ को हार्दिक मंगलमय शुभकामना समेत व्यक्त गरिएको छ।

समितिले स्थानीय तिथि, समय र भौगोलिक अवस्थालाई आधार मानेर हरेक वर्ष विभिन्न देशका लागि छुट्टाछुट्टै साइत सार्वजनिक गर्दै आएको छ। यसबाट विदेशमा बसोबास गर्ने नेपाली समुदायलाई आफ्नो स्थानीय समयअनुसार दशैंको टीका तथा धार्मिक विधि सम्पन्न गर्न सहज हुने अपेक्षा गरिएको छ।