अमेरिका र इरानबीचको युद्ध झन् उग्र बन्दै जाँदा अमेरिकी राष्ट्रपति डोनाल्ड ट्रम्पले फेरि कडा र विवादास्पद चेतावनी दिएका छन्। उनले इरानले तोकिएको समयसीमाभित्र होर्मुज सबै जहाजका लागि नखोले “विद्युत् केन्द्र र पुलहरू ध्वस्त पारिने” धम्की दिएका छन्।

ट्रम्पले आफ्नो सामाजिक सञ्जाल Truth Social मार्फत अपशब्दसमेत प्रयोग गर्दै इरानलाई चेतावनी दिएका थिए। उनले “नरक झारिने” अघिल्लो चेतावनी दोहोर्‍याउँदै इरानले जलडमरूमध्य नखोले गम्भीर परिणाम भोग्नुपर्ने बताएका छन्। तर त्यससँगै अमेरिकी सञ्चारमाध्यमसँग कुरा गर्दै उनले इरानसँग सम्झौता हुने “राम्रो सम्भावना” रहेको पनि बताएका छन्।

इरानले भने ट्रम्पको अल्टिमेटमलाई “लाचार, चिन्तित र मूर्खतापूर्ण” भन्दै उपहास गरेको छ। इरानी राष्ट्रपति कार्यालयका प्रवक्ता महदी तबातबाइले युद्धका कारण भएको क्षतिको क्षतिपूर्ति पाउने व्यवस्था भए मात्र जलडमरूमध्य खोलिने संकेत दिएका छन्। साथै इरानी सैन्य अधिकारी अली अब्दोल्लाही अलियाबादीले ट्रम्पको चेतावनीलाई असन्तुलित र अव्यवस्थित प्रतिक्रिया भन्दै अमेरिकामाथि नै “नरकका ढोका खुल्ने” चेतावनी दिएका छन्।

यसैबीच, इरानमा खसालिएको अमेरिकी एफ–१५ युद्धक विमानका दोस्रो सदस्यलाई पनि जोखिमपूर्ण उद्धार अभियानमार्फत सुरक्षित निकालिएको ट्रम्पले दाबी गरेका छन्। यसअघि उक्त विमानका पाइलटलाई तत्काल उद्धार गरिएको थियो भने अर्को सदस्यको खोजी दक्षिण–पश्चिम इरानको पहाडी क्षेत्रमा भइरहेको थियो।

युद्ध एक महिनाभन्दा बढी समयदेखि जारी रहँदा इरानले होर्मुज जलडमरूमध्यमा आवागमन उल्लेखनीय रूपमा अवरुद्ध गरेको छ। विश्वको करिब २० प्रतिशत तेल तथा ग्यास यही मार्गबाट ओसारपसार हुने भएकाले यसको असर अन्तर्राष्ट्रिय बजारमा प्रत्यक्ष देखिएको छ। पछिल्ला हप्ताहरूमा ब्रेन्ट क्रुड तेलको मूल्य ७३ डलरबाट बढेर १०० डलरभन्दा माथि पुगेको छ, जसले विश्वभर महँगी बढ्ने चिन्ता बढाएको छ।

उता, अमेरिका र इजरायलले इरानका सैन्य, ऊर्जा तथा औद्योगिक पूर्वाधारमा आक्रमण जारी राखेका छन्। पछिल्लो समय दक्षिण–पश्चिम इरानस्थित कासिम सुलेमानी अन्तर्राष्ट्रिय विमानस्थलमा पनि आक्रमण भएको जनाइएको छ। साथै इजरायलले थप ऊर्जा संरचनामाथि आक्रमण गर्न अमेरिकी स्वीकृतिको प्रतीक्षा गरिरहेको बताइएको छ।

यसको जवाफमा इरानले इजरायल र अमेरिकी सहयोगी खाडी देशहरूतर्फ ड्रोन तथा मिसाइल आक्रमण जारी राखेको छ। इजरायलको हाइफा शहरमा एक आवासीय भवनमा प्रत्यक्ष मिसाइल प्रहार हुँदा चार जना घाइते भएका छन्।

त्यसैगरी, अबुधाबीमा रहेको बोरुज पेट्रोकेमिकल उद्योगमा मिसाइलका अवशेष झर्दा आगलागी भएको अधिकारीहरूले बताएका छन्। कुवेतले पनि इरानी ड्रोन आक्रमणबाट तेल तथा पेट्रोकेमिकल संरचनामा गम्भीर क्षति पुगेको जनाएको छ। साथै बहराइनमा समेत औद्योगिक तथा इन्धन संरचनाहरू लक्षित आक्रमण भएको जानकारी आएको छ।

लगातार बढिरहेको द्वन्द्वका कारण मध्यपूर्व मात्र नभई विश्व अर्थतन्त्र, ऊर्जा आपूर्ति र सुरक्षा अवस्था गम्भीर संकटतर्फ उन्मुख हुँदै गएको विश्लेषकहरूको भनाइ छ।