मिनियापोलिसस्थित एनाउन्सिएसन क्याथोलिक चर्चमा बुधबार साँझ भएको सामूहिक गोलीकाण्डमा दुःखद घटना घटेको छ। प्रहरी प्रमुख ब्रायन ओ’हाराले जनाएअनुसार प्रार्थना गरिरहेका ८ र १० वर्षका दुई बालबालिकाको मृत्यु भएको छ। सो घटनामा १७ जना घाइते भएका छन्, जसमा १४ जना बालबालिका रहेका छन्।

पत्रकार सम्मेलनमार्फत ओ’हाराले आक्रमणकारीले रायफल, शटगन र पिस्तोल गरी तीनवटा हतियार प्रयोग गरेको प्रारम्भिक अनुसन्धानले देखाएको जानकारी दिएका छन्। आक्रमणपछि रोबिन वेष्टम्यान र रोबर्ट वेष्टम्यान नामक व्यक्तिहरूले चर्चको पछाडिपट्टि गएर आत्महत्या गरेको प्रहरीले पुष्टि गरेको छ।

मिनेसोटाका गभर्नर टिम वाल्जले सामाजिक सञ्जाल “X” मा घटनाप्रति गहिरो दुःख प्रकट गर्दै प्रभावित विद्यार्थी र शिक्षकप्रति प्रार्थना व्यक्त गरेका छन्। अमेरिकी गृह सुरक्षा सचिव क्रिस्टी नोएमले विभाग यस घटनालाई नजिकैबाट नियालिरहेको बताएकी छन्। मिनियापोलिसका मेयर ज्याकब फ्रे पनि प्रहरी प्रमुख ओ’हारा र आपतकालीन प्रतिक्रिया टोलीसँग समन्वय गर्दै प्रत्यक्ष अनुगमन गरिरहेका छन्।

गोलीकाण्ड सुरु भएपछि सेंट पॉल कार्यालयका एटीएफ (Alcohol, Tobacco, Firearms and Explosives) एजेन्टहरू तत्कालै घटनास्थलमा खटिएका थिए। यस घटनाले फेरि अमेरिकामा हतियार नियन्त्रणबारेको बहसलाई बल दिएको छ।

मिनियापोलिसको एनाउन्सिएसन क्याथोलिक चर्चमा भएको सामूहिक गोलीकाण्डपछि थप विवरण सार्वजनिक भएका छन्। प्रहरीले आक्रमणकारी रोबिन वेष्टम्यानसँग एक “म्यानिफेस्टो” भेटिएको पुष्टि गरेको छ, जसमा केही अशान्तिकर रचनाहरू र भिडियो सामग्री थिए। सो भिडियो युट्युबमा प्रकाशित गर्ने तयारीमा राखिएको थियो तर एफबीआईको सहयोगमा हटाइएको छ। प्रहरी प्रमुख ब्रायन ओ’हाराले सो म्यानिफेस्टो अहिले अनुसन्धानकर्ताको समीक्षा अन्तर्गत रहेको जनाएका छन्।

२३ वर्षीया वेष्टम्यानले हालै कानुनी प्रक्रियाबाट आफ्नो नाम र पहिचान परिवर्तन गरेको तथ्य पनि बाहिर आएको छ। २०१९ मा जन्मदर्तामा रहेको नाम रोबर्टबाट रोबिनमा परिवर्तन गरिएको अदालतको कागजातमा उल्लेख छ। प्रहरीले हालसम्म आक्रमणको प्रत्यक्ष कारणबारे स्पष्ट जानकारी नपाए पनि म्यानिफेस्टो र अन्य कागजातका आधारमा उद्देश्य पत्ता लगाउने प्रयास भइरहेको जनाएको छ। तीनवटा आवासीय स्थानमा समेत खोजी अनुमति जारी गरिएको छ।

यो घटनामा ८ र १० वर्षका दुई बालबालिकाको ज्यान गएको छ भने १४ बालबालिका सहित १७ जना घाइते भएका छन्। आक्रमणकारीले रायफल, शटगन र पिस्तोल प्रयोग गरेको प्रहरीको भनाइ छ।

घटनापछि अमेरिकी राजनीतिज्ञ, धार्मिक संस्था र विभिन्न समूहहरूले दुख व्यक्त गरेका छन्। पूर्व उपराष्ट्रपति कमला ह्यारिसले सामाजिक सञ्जालमा “यो नयाँ शैक्षिक वर्षको सुरुवात उत्साह र अपेक्षाले भरिएको हुनुपर्ने तर निर्दोष बालबालिकामाथि हिंसाले यसलाई कलंकित बनाएको” भन्दै नेताहरूले अब निर्णायक कदम चाल्नुपर्ने टिप्पणी गरेकी छिन्।

मिनेसोटाका गभर्नर टिम वाल्जले “यसरी निर्दोष जीवनमाथि आक्रमण हुनु अमानवीय” भन्दै राष्ट्रपति डोनाल्ड ट्रम्पसँग समन्वय गरेर संघीय सहयोग पाउने बताएका छन्। ट्रम्पले अमेरिकी झण्डा आधा झुकाएर पीडितहरूको सम्मान गर्ने बताए । टेक्ससका गभर्नर ग्रेग एबटले पनि आफ्नो राज्यमा झण्डा आधा झुकाउने घोषणा गरेका छन्।

यसैबीच, पोप लियो १४ औं ले मिनियापोलिसका आर्चबिसप बर्नार्ड हेबदालाई शोक सन्देश पठाउँदै सम्पूर्ण प्रभावित समुदायलाई शान्ति र धैर्यका लागि आशीर्वाद दिएका छन्। अमेरिकन क्याथोलिक बिशप सम्मेलनले पनि घटनाप्रति गहिरो पीडा प्रकट गरेको छ।

एफबीआईले यस घटनालाई घरेलु आतङ्कवाद र घृणा अपराध (hate crime) का रूपमा अनुसन्धान गरिरहेको जनाएको छ। गृह सुरक्षा सचिव क्रिस्टी नोएमले आक्रमणकारीलाई “अत्यन्त विक्षिप्त अपराधी” भन्दै निन्दा गरेकी छिन्। उनका अनुसार, आक्रमणकारीले प्रयोग गरेको हतियारको म्यागजिनमा “बालबालिकाका लागि”, “तिम्रो भगवान कहाँ छ?” र “डोनाल्ड ट्रम्पलाई मार” भन्ने शब्दहरू लेखिएका थिए।

घटनामा प्रत्यक्षदर्शी विद्यार्थी र स्थानीय बासिन्दाले देखेको दृश्य “भयावह र कहिल्यै नबिर्सिने घाउ” भएको बताएका छन्। मिनेसोटाका प्रमुख खेल क्लबहरू ट्विन्स र भाइकिङ्सले समेत विज्ञप्ति जारी गर्दै पीडित परिवारप्रति संवेदना प्रकट गरेका छन्।

यो रक्तपातपूर्ण घटनाले फेरि एकपटक अमेरिकामा बन्दुक नियन्त्रण र विद्यालय–धार्मिक स्थलको सुरक्षा सम्बन्धी बहसलाई तीव्र पारेको छ।