युक्रेनी राष्ट्रपति भोलोडिमिर जेलेन्स्कीले रुसले युक्रेनमाथि हालसम्मकै सबैभन्दा ठूलो हवाई आक्रमण गरेको बताएका छन्। उनका अनुसार विभिन्न लहरमा गरिएको यो आक्रमणमा ७२८ ड्रोन र १३ क्रुज तथा ब्यालिस्टिक मिसाइल प्रयोग गरिएको थियो, जसले देशभरका प्रमुख सहरहरूलाई लक्षित गर्‍यो।

जेलेन्स्कीले यस आक्रमणलाई “सन्देश दिन खोजिएको क्रूर हमला” भन्दै भर्त्सना गरे। उनले भने, “युद्धविराम र शान्तिको पहल भइरहेका बेला मात्र रुसले ती सबै प्रयास अस्वीकार गर्दै आक्रमण बढाएको छ।”

यो हमला त्यसपछि भएको हो, जब अमेरिकी राष्ट्रपति डोनाल्ड ट्रम्पले युक्रेनलाई थप हतियार पठाउने निर्णय गरे – जसले गत साता स्थगनमा राखिएको सैन्य सहयोगलाई उल्टाएको संकेत गर्छ। अमेरिकी सञ्चारमाध्यमका अनुसार, सहयोग स्थगनको निर्णयबारे ट्रम्पलाई जानकारी नै थिएन।

मंगलबार ट्रम्पले रुसी राष्ट्रपति भ्लादिमिर पुटिनप्रति आफ्नो असन्तुष्टि स्पष्ट रूपमा व्यक्त गरे। “हामीमाथि पुटिनबाट थुप्रै झूठा कुरा आइरहेका छन्,” ट्रम्पले भने, “उनी सतहमा त मिठास देखाउँछन्, तर अन्ततः त्यो केही कामको हुँदैन।”

यसमा क्रेमलिन प्रवक्ता दिमित्री पेस्कोभले प्रतिक्रिया दिँदै भने, “ट्रम्पको शैली प्रायः कठोर हुन्छ, त्यसैले हामी यस्ता बयानप्रति शान्त छौं।”

ट्रम्प र पुटिनबीच नियमित सम्पर्क भइरहे पनि ती संवादहरूले युद्धविरामको दिशामा कुनै ठोस प्रगति ल्याउन सकेको छैन। एक पटक ट्रम्पले युक्रेन युद्ध एक दिनमै सकाउने दाबी गरेका थिए। तर पछिल्लो हप्ता पुटिनसँगको फोन संवादपछि ट्रम्पले भने, “उनी (पुटिन) अन्तिम सीमासम्म जान चाहन्छन्, मान्छे मारिरहन चाहन्छन्, यो राम्रो होइन।”

ट्रम्प प्रशासनले युक्रेनमाथिको सैन्य सहयोग स्थगन गर्ने निर्णय रक्षा सचिव पिट हेगसेथ र नीतिनिर्माण विभागका उपसचिव एल्ब्रिज कोलबीले गरेको जनाइएको छ। पत्रकारले यो निर्णय कसले गर्‍यो भनेर सोध्दा, ट्रम्पले हेगसेथको छेउमै बस्दै भने, “मलाई थाहा छैन, तिमी नै भन त।”

तर अहिले निर्णय फिर्ता लिन लागिएको देखिन्छ। अमेरिकी मिडिया Axios अनुसार, अब युक्रेनलाई १० वटा प्याट्रियट मिसाइल प्रणाली पठाइने सम्भावना छ। यी प्रणाली रुसका बढ्दो मिसाइल र ड्रोन आक्रमणहरू रोक्न युक्रेनका लागि अत्यावश्यक छन्।

यता ट्रम्पले रुसीसँग व्यापार गर्ने मुलुकहरूमा ५०० प्रतिशत भन्सार लगाउने विधेयकबारे पनि विचार गरिरहेको बताएका छन्। उक्त विधेयक रिपब्लिकन सिनेटर लिण्डसे ग्राहामले प्रस्ताव गरेका हुन्। जनवरीमा कार्यभार सम्हालेयता ट्रम्पले रुसविरुद्ध प्रतिबन्धको धम्की दिए पनि हालसम्म ठोस कदम उठाएका छैनन्।

रुस–युक्रेन युद्ध फेब्रुअरी २०२२ मा सुरु भएको थियो। पूर्वी युक्रेन र राजधानी किभलगायत सम्पूर्ण देश रुसी आक्रमणको चपेटामा छन्। पोल्याण्डको सीमावर्ती सहर लुत्स्कमा मंगलबार रातिको आक्रमण सबैभन्दा गम्भीर भएको बताइएको छ। लभिभ र रिभने सहरहरूमा पनि विस्फोट भएका थिए।

रुसले युक्रेनी ड्रोन आक्रमणबाट आफ्नो कुर्स्क सीमावर्ती क्षेत्रमा तीनजनाको मृत्यु र सात घाइते भएको दाबी गरेको छ।

यसैबीच, रुसले पूर्वी युक्रेनमा गर्मीयामको आक्रमण जारी राखेको बताएको छ। “हामी अगाडि बढिरहेका छौं,” क्रेमलिनका प्रवक्ता पेस्कोभले बुधबार भने, “प्रत्येक नयाँ दिन युक्रेनीहरूले नयाँ वास्तविकतालाई स्वीकार्नुपर्छ।”

शान्ति वार्ता अझै अनिश्चित देखिएको छ। यस वर्ष दुई पटक वार्ता भए पनि कुनै ठोस उपलब्धि हुन सकेको छैन। र न मस्को न किभ, दुवै पक्ष वार्ताबाट युद्ध टुंगिन्छ भन्नेमा आशावादी देखिँदैनन्।