क्यानडाले डिजिटल सेवा कर फिर्ता लिँदै अमेरिका संग व्यापार वार्ता पुनः सुरु गर्ने

ट्रम्पको कडा चेतावनीपछि क्यानडाको निर्णय, जुलाई २१ सम्म व्यापार सम्झौताको प्रयास

क्यानडाका प्रधानमन्त्री मार्क कार्नीले राष्ट्रपति डोनाल्ड ट्रम्पसँग व्यापार वार्ता पुनः सुरु गर्न सहमति जनाएका छन्। क्यानडाले अमेरिकी प्रविधि कम्पनीहरू माथि लगाइएको डिजिटल सेवा कर (Digital Services Tax) फिर्ता लिने निर्णय गरेपछि यो सहमति भएको हो।

क्यानडाको वित्त मन्त्रालयले आइतवार राति एक विज्ञप्ति जारी गर्दै भने:

“संयुक्त राज्य अमेरिकासँग पारस्परिक रूपमा लाभदायक व्यापार सम्झौताको पूर्वसन्ध्यामा क्यानडाले डिजिटल सेवा कर फिर्ता लिने निर्णय गरेको छ।”

यस निर्णयसँगै क्यानडाले जुन ३०, २०२५ मा लागु हुने भनिएको कर संकलन कार्य स्थगित गरेको छ र डिजिटल सेवा कर ऐन खारेज गर्ने विधेयक संसदमा दर्ता गर्ने तयारी भइरहेको छ।

ट्रम्पको चेतावनीपछि क्यानडाको यु-टर्न

अमेरिकी राष्ट्रपति डोनाल्ड ट्रम्पले केही दिनअघि सामाजिक सञ्जाल Truth Social मा पोस्ट गर्दै क्यानडासँगका सबै व्यापार वार्ता तत्काल अन्त्य गर्ने निर्णय सुनाएका थिए। ट्रम्पले क्यानडाको डिजिटल सेवा करलाई “अत्यन्तै अन्यायपूर्ण कर” भन्दै त्यसको विरोध गरेका थिए।

उनले लेखे:

“युरोपेली संघको नक्कल गर्दै क्यानडाले यो कर लगाएको छ। यो कर अस्वीकार्य छ। त्यसैले हामीले क्यानडासँगको सम्पूर्ण व्यापार वार्ता तत्काल अन्त्य गरेका छौँ।”

डिजिटल सेवा कर के हो?

यो कर जुन २०२४ देखि क्यानडामा लागु भएको थियो। यसले अमेजन, मेटा, गुगल, एप्पल जस्ता विदेशी वा क्यानडाभित्रका ठूला प्रविधि कम्पनीहरूलाई क्यानडेली प्रयोगकर्ताबाट आर्जन गरिएको आम्दानीमा ३% कर तिर्नुपर्ने व्यवस्था गरेको थियो।

अब के हुन्छ?

क्यानडाको पछिल्लो निर्णयपछि ट्रम्प प्रशासनले वार्ता पुनः सुरु गर्ने सहमति जनाएको छ। दुबै देशबीच जुलाई २१, २०२५ भित्र नयाँ व्यापार सम्झौता टुंग्याउने लक्ष्य राखिएको छ।

तर ट्रम्पले चेतावनी दिएका छन्:

“हामी आगामी सात दिनभित्र क्यानडालाई उनीहरूले अमेरिका संग व्यापार गर्न तिर्नुपर्ने नयाँ ट्यारिफ बारे जानकारी दिनेछौँ।”

उनले क्यानडालाई “व्यापार गर्न अत्यन्तै कठिन देश” भन्दै आरोप लगाए। ट्रम्पका अनुसार क्यानडाले अमेरिकी दुग्धजन्य वस्तुहरूमा ४००% सम्मको ट्यारिफ लगाउने गरेको छ।

पृष्ठभूमि: जी–७ बैठक र सम्वादको विघटन

यो व्यापार विवाद जून १६, २०२५ मा क्यानडाको क्यानानास्किसमा सम्पन्न जी–७ बैठकपछि सतहमा आएको हो। उक्त बैठकमा ट्रम्प र कार्नीबीच ३० दिनभित्र नयाँ आर्थिक सम्झौता टुंग्याउने सहमति भएको थियो। तर डिजिटल करको कारण ट्रम्पले वार्ता तोडेका थिए।

अब कर फिर्ता भएपछि सम्बन्ध सामान्य बनाउने कोशिस सुरू भएको छ।