नेपाल तामाङ घेदुङ प्रवास शाखा नेपाल तामाङ घेदुङ प्रवास शाखा साउदी अरेबिया ले मञ्जुश्री संवत २८६२ को ता–ल्हो (घोडा वर्ग) सोनाम ल्होछार तथा बृहत् सांस्कृतिक कार्यक्रम सन् २०२६ भव्य रूपमा सम्पन्न गरेको छ।

साउदी अरेबिया मा कार्यरत नेपाली समुदायलाई लक्षित गरी समयानुकूल आयोजना गरिएको कार्यक्रम राजधानी रियाद को एक्जिट–९ क्षेत्रमा सम्पन्न भएको थियो। कार्यक्रमका प्रमुख अतिथि नेपाल सरकारकी कार्यवाहक राजदूत सिर्जना अधिकारी रहनुभएको थियो। परम्पराअनुसार लामाद्वारा मन्त्रउच्चारणसहित भगवान बुद्धको प्रतिमामा पूजा–अर्चना गरेर कार्यक्रम सुरु गरिएको थियो भने राजदूत अधिकारीले दीप प्रज्वलन गर्नुभएको थियो।

आयोजकका अनुसार तामाङ समुदायको परम्परागत १२ वर्ग—जिवा (मुसा), लाङ (गाई), ताक (बाघ), ह्ययोही (खरायो), डुक (ड्रयागन), डुल (सर्प), ता (घोडा), ल्हुग (भेडा), टे (बादर), ज्या (चरा), खी (कुकुर) र फाक (बँदेल)—अनुसार यस वर्ष डुल (सर्प) वर्गलाई बिदाइ गरी ता (घोडा) वर्गलाई स्वागत गरिएको जनाइएको छ। वैदेशिक रोजगारीमा रहेर पनि तामाङ समुदायको राष्ट्रिय पर्व सोनाम ल्होछारलाई निरन्तरता दिँदै भाषा, संस्कृति र परम्पराको जगेर्ना गर्ने उद्देश्यसहित कार्यक्रम आयोजना गरिएको आयोजकले स्पष्ट पारे।

कार्यक्रमलाई सम्बोधन गर्दै कार्यवाहक राजदूत सिर्जना अधिकारीले साउदीमा रहेका नेपाली समुदायले आफ्नो मौलिक संस्कृति संरक्षण गर्न यस्ता कार्यक्रम आयोजना गरेकोमा प्रशंसा व्यक्त गर्नुभयो। उहाँले साउदी अरेबियामा कार्यरत नेपालीको हक–हितका लागि दूतावास सधैं तत्पर रहेको बताउँदै काम गर्ने क्रममा स्थानीय कानुन र नियमको पूर्ण पालना गर्न आग्रह गर्नुभयो। अनुशासनमा रहेर काम गर्न तथा कुनै समस्या परेमा वा अलपत्र परेका नेपालीबारे दूतावासलाई जानकारी गराउन पनि उहाँले अनुरोध गर्नुभयो।

सांस्कृतिक कार्यक्रममा तामाङ समुदायको झाँकीसहित विभिन्न मौलिक नृत्य प्रस्तुत गरिएका थिए। नेपालबाट आमन्त्रित सेलो गायिका लक्ष्मी सेङतान तामाङ ले विशेष सांगीतिक प्रस्तुति दिँदै दर्शकलाई मनोरञ्जन प्रदान गर्नुभयो। साथै स्थानीय कलाकारहरूको आकर्षक प्रस्तुति पनि कार्यक्रममा समावेश थियो।

कार्यक्रमका अध्यक्ष अमृत घिसिङ तामाङ ले कार्यक्रम सफल बनाउन सहयोग गर्ने सबैप्रति धन्यवाद ज्ञापन गर्नुभयो। कार्यक्रममा तामाङ समुदायको इतिहास, संस्कृति र विशेषताबारे लक्ष्मी तामाङ र नगेश तामाङ ले जानकारी दिएका थिए भने कार्यक्रम सञ्चालन रोसन गलान तामाङ ले गर्नुभएको थियो।