अमेरिकी सर्वोच्च अदालतले सरकार बन्द लम्बिँदै जाँदा ट्रम्प प्रशासनलाई SNAP (खाद्यान्न सहायता कार्यक्रम) का लागि आवश्यक सबै रकम तुरुन्त उपलब्ध गराउन आदेश दिएको तल्लो अदालतको निर्णयलाई अस्थायी रूपमा रोक लगाएको छ। यसअघि रोड आइल्याण्डका संघीय न्यायाधीश ज्याक म्याककोनेलले सरकारले SNAP कार्यक्रमलाई केवल ६५ प्रतिशत मात्र वित्तीय सहयोग गर्न सक्ने योजना अस्वीकार गर्दै २४ घण्टाभित्र करिब ९ अर्ब डलर बराबरको पूर्ण रकम उपलब्ध गराउन आदेश दिएका थिए। तर अपिल अदालतले आदेश कायम राखेपछि ट्रम्प प्रशासनले आपतकालीन अपिल गर्दै सर्वोच्च अदालतमा पुगेको थियो।

SNAP कार्यक्रम अमेरिकामा ४२ मिलियनभन्दा बढी न्यून-आय परिवार को आधारभूत खाद्यान्न खर्चमा सहयोग गर्ने प्रमुख सामाजिक सहायता योजना हो। सरकार बन्दका कारण यो कार्यक्रम ६० वर्षमा पहिलोपटक अवरुद्ध हुने स्थिति आएको थियो। न्यायाधीश म्याककोनेलले भनेका थिए, “मानिसहरू धेरै समयदेखि कठिनाई झेलिरहेका छन्। यदि सरकारले पूर्ण भुक्तानी नगरे लाखौं नागरिक भोकै बस्न बाध्य हुन्छन्।”

ट्रम्प सरकारको तर्फबाट सर्वोच्च अदालतमा दर्ता गरिएको अपिलमा प्रशासनले भनेको थियो, “यदि आज राति नै ४ अर्ब डलर ट्रान्सफर गर्न बाध्य पारियो भने सरकार गम्भीर आर्थिक जोखिम भोग्नुपर्नेछ। त्यसैले आदेशमा तत्काल रोक आवश्यक छ।” सर्वोच्च अदालतले प्रशासनको आग्रह स्वीकार्दै अस्थायी रोक लगाइदिएको छ।

न्यूयोर्क राज्यकी अटर्नी जनरल लेटिसिया जेम्स ले सर्वोच्च अदालतको यो कदमलाई “दुर्भाग्यपूर्ण र अमानवीय” भन्दै आलोचना गरिन्। उनका अनुसार, “भोकसँग खेलेर कुनै पनि सरकारले नैतिकताको पाठ सिकाउन सक्दैन।” त्यस्तै, विभिन्न स्थानीय फूड बैंकहरूले SNAP रकम रोकिने संकेतसँगै खाना वितरण केन्द्रहरूमा भीड अत्यधिक बढेको बताएका छन्।

यसबीच अमेरिकी कृषि विभाग (USDA) ले भने SNAP भुक्तानीलाई पूर्ण रूपमा कार्यान्वयन गर्ने तर्फ प्रयास भइरहेको दाबी गरेको छ। विभागका उपसचिव पैट्रिक पेन्न ले देशभरका SNAP कार्यालयहरूलाई पठाएको सूचनामा भनेका छन्, “हामी अदालतको आदेशअनुसार नवम्बरसम्मका भुक्तानीका लागि आवश्यक रकम उपलब्ध गराउने प्रक्रिया पूरा गरिरहेका छौँ।”

सरकार बन्दका कारण ट्रम्प प्रशासनका अधिकारीहरूले SNAP कार्यक्रमलाई पूर्ण रूपमा होइन आंशिक रूपमा चलाउने योजना बनाएका थिए। तर, न्यायाधीश म्याककोनेलले यसलाई जनताको जीवनमा प्रत्यक्ष असर पार्ने ‘अपरिबर्तनीय क्षति’ भनी वर्णन गर्दै अस्वीकार गरेका थिए। उनका अनुसार, “यदि SNAP रोकियो भने फूड बैंकहरू अत्यधिक दबाबमा पर्नेछन्, र देशभर निरर्थक पीडा र भोक फैलिनेछ।”

अब SNAP भुक्तानी पुनः सुरु हुने वा ढिलो हुने भन्ने कुरा सर्वोच्च अदालतको आगामी फैसलामा निर्भर हुनेछ। तर यतिबेला, लाखौं अमेरिकी परिवारले आफ्नो र भोलिका भोजनको अनिश्चितता झेलिरहेका छन्।