अमेरिकी भिसा रद्दपछि कोलम्बियाली राष्ट्रपति पेट्रोको कडा प्रतिक्रिया “अन्तर्राष्ट्रिय कानुनको अपमान”

 कोलम्बियाली राष्ट्रपति गुस्ताभो पेट्रोले अमेरिकी सरकारद्वारा आफ्नो भिसा रद्द गर्ने निर्णयलाई आलोचना गर्दै वाशिङ्टनमाथि अन्तर्राष्ट्रिय कानुन उल्लङ्घन गरेको आरोप लगाएका छन्।

शनिबार सामाजिक सञ्जाल ‘एक्स’ (X) मार्फत प्रतिक्रिया जनाउँदै राष्ट्रपति पेट्रोले भने, “अब मसँग संयुक्त राज्य अमेरिकाको भिसा छैन। मलाई कुनै मतलब छैन। म कोलम्बियाली मात्र होइन, युरोपेली नागरिक पनि हुँ। म आफूलाई संसारको स्वतन्त्र व्यक्ति मान्छु।” उनले थपे, “गाजामा भइरहेको नरसंहारबारे आलोचना गरेकै कारण भिसा खारेज गर्नुले देखाउँछ – अमेरिका अब अन्तर्राष्ट्रिय कानुनलाई सम्मान गर्दैन।”

गाजाबारे पेट्रोको कठोर अभिव्यक्ति

संयुक्त राष्ट्र महासभाको साइडलाइनमा न्यूयोर्कस्थित संयुक्त राष्ट्र मुख्यालयबाहिर आयोजित प्रदर्शनमा सम्बोधन गर्दै पेट्रोले गाजामा इजरायलको कार्यलाई “नरसंहार” भनेका थिए। उनले विश्वव्यापी सशस्त्र बल गठन गरी प्यालेस्टाइन लाई मुक्त गर्ने प्राथमिकता दिनुपर्ने माग गरेका थिए। त्यही क्रममा उनले अमेरिकी सैनिकलाई सम्बोधन गर्दै भनेका थिए, “मानवताको आदेश मान्नुहोस्, ट्रम्पका आदेश नमान्नुहोस्।”

यसअघि संयुक्त राष्ट्रको एक अनुसन्धान प्रतिवेदनले गाजामा इजरायलको कारबाहीलाई नरसंहारसँग मिल्दोजुल्दो भनेको छ, तर इजरायलले निरन्तर आरोप अस्वीकार गर्दै आफ्नो कदम आत्मरक्षात्मक भएको दाबी गर्दै आएको छ।

वाशिङ्टनको निर्णय र कोलम्बियाको आपत्ति

अमेरिकी विदेश मन्त्रालयले पेट्रोको “लापरबाहीपूर्ण र उत्तेजनात्मक गतिविधि” का कारण भिसा खारेज गरिएको जानकारी दिएको छ। कोलम्बियाको परराष्ट्र मन्त्रालयले भने अमेरिकी कदमलाई “कूटनीतिक हतियारको दुरुपयोग” भन्दै संयुक्त राष्ट्रको मूल मर्मविपरीत भएको दाबी गरेको छ।

कोलम्बियाली मन्त्रालयले भनेको छ, “संयुक्त राष्ट्रले स्वतन्त्र अभिव्यक्ति र सदस्य राष्ट्रको स्वतन्त्रतालाई संरक्षण गर्नुपर्छ। यस्तो अवस्था दोहोरिएमा यूएनले तटस्थ देशलाई आतिथ्य दिन आग्रह गर्नुपर्छ, ताकि सदस्य राष्ट्रका प्रतिनिधि स्वतन्त्र रूपमा उपस्थित हुन सकून्।”

अमेरिका–कोलम्बिया सम्बन्धमा तनाव

डोनाल्ड ट्रम्प पुनः अमेरिकी राष्ट्रपति बनेपछि बोगोटा र वाशिङ्टनबीच सम्बन्ध झन् तनावपूर्ण बनेको छ। यसै वर्ष पेट्रो सरकारले अमेरिकाबाट निर्वासित गर्न पठाइएका कोलम्बियाली नागरिकहरूको विमान अवतरण रोक्दा अमेरिका तर्फबाट कर र प्रतिबन्धको चेतावनी आएको थियो। पछि दुवै पक्षबीच अस्थायी सहमति भएको थियो।

गत जुलाईमा दुवै देशले आफ्ना राजदूत फिर्ता बोलाएका थिए। पेट्रोले अमेरिकी अधिकारीहरूलाई “कूपको योजना बनाएको” आरोप लगाएपछि वाशिङ्टनले त्यसलाई “आधारहीन” भनेको थियो।

सन् २०२४ मा पेट्रोले इजरायलसँग कूटनीतिक सम्बन्ध विच्छेद गरेका थिए र कोलम्बियाबाट इजरायलतर्फ कोइला निर्यातमा समेत प्रतिबन्ध लगाएका थिए।