काठमाडौंमा कला, संगीत, सञ्चार, समाजसेवा, शिक्षा, स्वास्थ्य, सौन्दर्य तथा उद्यमशीलता क्षेत्रमा योगदान पुर्‍याउने स्रष्टा र प्रतिभाहरूलाई एउटै मञ्चमा सम्मान गर्दै “ग्लोबल स्टार अवार्ड–२०२६” भव्य रूपमा सम्पन्न भएको छ। दक्ष इन्टरनेशनलको आयोजनामा तथा राष्ट्रखबरको सहकार्यमा आयोजित दोस्रो संस्करणको उक्त समारोह राजधानीको सुकेधारास्थित होटल मर्क्युरमा विशेष आकर्षणका साथ सम्पन्न गरिएको हो।

समारोहमा नेपाली कला, साहित्य, संगीत, पत्रकारिता तथा सामाजिक क्षेत्रमा लामो समयदेखि सक्रिय रहँदै उल्लेखनीय योगदान पुर्‍याएका व्यक्तित्वहरूलाई सम्मान तथा अवार्ड प्रदान गरिएको थियो।

उक्त बिशेष समारोहमा लोकसंगीत, सञ्चार र साहित्य क्षेत्रमा दीर्घकालीन योगदान पुर्‍याएका वरिष्ठ लोकगायक तथा अग्रज पत्रकार रामप्रसाद खनाललाई “लोकगीत, दोहोरी गीत, संगीत, पत्रकारिता र साहित्य क्षेत्रको अति विशिष्ट सम्मान–२०२६” प्रदान गरिएको थियो । चलचित्र छायांकन मा ब्यस्त रहेका कारण उक्त कार्यक्रममा उपस्थित हुन असमर्थ रहेका खनालको उक्त सम्मान अर्का अग्रज कलाकार राजाराम पौडेलले ग्रहण गर्नुभएको थियो भने सम्मान कला क्षेत्र का दुइ महान हस्तीहरु नीर शाह र मदन कृष्ण श्रेष्ठले प्रदान गर्नु भएको थियो।

त्यसैगरी कार्यक्रममा वरिष्ठ अभिनेत्री बसुन्धरा भुसाल लाई नेपाली चलचित्र क्षेत्रमा पुर्‍याएको अतुलनीय योगदानको कदर गर्दै “दिग्गज अभिनेत्री सम्मान–२०२६” प्रदान गरिएको थियो। उर्मिला श्रेष्ठलाई ‘सर्वोत्कृष्ट राष्ट्रसेवक सम्मान’ प्रदान गरियो। चर्चित मोडल पल शाहलाई ‘ग्लोबल स्टार अफ द डिकेड’ र वरिष्ठ गायिका सुनिता लुइँटेललाई ‘जीवित धरोहर सम्मान’ बाट विभूषित गरियो। यम बराल, रमेश बुढाथोकी, र यमन श्रेष्ठलगायतका कलाकारहरू पनि विभिन्न विधामा सम्मानित हुनुभयो।

कार्यक्रममा पत्रकारिता क्षेत्रमा योगदान पुर्‍याउने पत्रकारहरू अखण्ड भण्डारी, कल्पना शर्मा, वीरेन्द्र जैरु, खेमबहादुर बम तथा उदयराज शर्मालाई “पत्रकारिता विशेष सम्मान” प्रदान गरिएको थियो। साथै विभिन्न विधामा सक्रिय कलाकार, सञ्चारकर्मी, चिकित्सक, उद्यमी, फेसन डिजाइनर, समाजसेवी तथा मोडलहरूलाई पनि “ग्लोबल स्टार सम्मान–२०२६” बाट सम्मानित गरिएको थियो।

संगीत क्षेत्रमा निरन्तर समर्पित योगदानका लागि वरिष्ठ गायिका सुनिता लुइटेल लाई “संगीतमा समर्पित सर्वोत्कृष्ट साधक तथा जीवित धरोहर सम्मान–२०२६” प्रदान गरिएको थियो भने भजन गायक रेशम सापकोटा लाई “संगीत रत्न सम्मान” प्रदान गरिएको थियो।

सम्मानित व्यक्तित्वहरूमा यमन श्रेष्ठ, रमेश बुढाथोकी, विष्णु कुँवर ‘धरती माता’, जीवन शर्मा, राममणि भट्टराई, पुरुषोत्तम आचार्य, सोनी अधिकारी, अनिल खनाल, पूर्णायु आयुर्वेदिक अस्पतालका प्रल्हाद चौहान, दीना गुरुङ, गीता उप्रेती, साहिल खान, सनम कठायत, पारु खड्का, डा. रुपेश बनियाँ, मनीषा राई, रमेश पाठक, कमल खड्का, पुरु भण्डारी, अनिल भण्डारी, प्रियंका प्रसाई तथा एलोन रेशम लगायतका व्यक्तित्वहरू रहेका थिए।

समारोहमा नेपाली चलचित्र क्षेत्रका वरिष्ठ अभिनेता निर शाह प्रमुख अतिथिका रूपमा सहभागी हुनुहुन्थ्यो भने हास्यव्यंग्य कलाकार मदनकृष्ण श्रेष्ठ विशिष्ट अतिथिका रूपमा उपस्थित हुनुहुन्थ्यो। कार्यक्रममा पूर्व उपसभामुख तथा प्रतिनिधिसभा सदस्य इन्दिरा राना मगर, पूर्वसचिव भीम उपाध्याय, गायक आनन्द कार्की, गायिका देविका बन्दना, वरिष्ठ पत्रकार विदुर गिरी, वरिष्ठ पत्रकार नवराज बजगाईं, कार्यक्रम निर्देशक निशु झा, शिक्षा उद्यमी लक्ष्मण घिमिरे तथा व्यवसायी सिपी हुमागाईं लगायत विभिन्न क्षेत्रका विशिष्ट व्यक्तित्वहरूको उल्लेखनीय उपस्थिति रहेको थियो।

समारोहको आयोजना दक्ष इन्टरनेशनलले दोस्रो संस्करणका रूपमा गरेको हो। आयोजकका अनुसार यसअघि पहिलो संस्करण नेपाल प्रहरी क्लबमा सम्पन्न गरिएको थियो। कार्यक्रममा चर्चित सेलिब्रेटी मेकअप आर्टिस्ट टेकराज पाण्डे आयोजक समितिका अध्यक्ष रहेका थिए भने कार्यक्रम निर्देशकको भूमिका राजेन्द्र लुइटेलले निर्वाह गर्नुभएको थियो। कार्यक्रमको सञ्चालन पत्रकार तथा रेडियो प्रस्तोता प्रियंका प्रसाईले गर्नुभएको थियो।

कार्यक्रमका वक्ताहरूले कला, संस्कृति, सञ्चार, शिक्षा, स्वास्थ्य र सामाजिक क्षेत्रमा निरन्तर योगदान पुर्‍याइरहेका व्यक्तित्वहरूको सम्मान र प्रोत्साहन गर्नु समाजका लागि सकारात्मक सन्देश भएको बताएका थिए। कार्यक्रममा बोल्दै आयोजक समितिका अध्यक्ष टेकराज पाण्डेले आगामी दिनमा “ग्लोबल स्टार अवार्ड” लाई अझ व्यापक र प्रभावकारी ढंगले निरन्तरता दिने प्रतिबद्धता व्यक्त गर्नुभयो।

त्यसैगरी प्रमुख अतिथि नीर शाह र विशेष अतिथि इन्दिरा राना मगरले सम्मानित सम्पूर्ण व्यक्तित्वहरूलाई बधाई तथा शुभकामना दिँदै नेपाली कला, संस्कृति, सञ्चार तथा सामाजिक क्षेत्रमा योगदान पुर्‍याउने प्रतिभाहरूलाई सम्मान गर्ने कार्य प्रशंसनीय रहेको बताएका थिए।

आकर्षक सांगीतिक प्रस्तुति, सम्मान वितरण तथा विशेष सांस्कृतिक कार्यक्रमसहित सम्पन्न उक्त समारोह देशभरका प्रतिभा, स्रष्टा र कर्मशील व्यक्तित्वहरूको योगदानलाई उजागर गर्ने उद्देश्यसहित अत्यन्त भव्य र सभ्य वातावरणमा सम्पन्न भएको आयोजकले जनाएको छ।