नेपाली चलचित्र क्षेत्रमा २० वर्षभन्दा बढी योगदान दिएका ९७ जना चलचित्रकर्मीलाई चलचित्र विकास बोर्डले विशेष कार्यक्रम आयोजना गरी चलचित्रकर्मी परिचयपत्र वितरण गरेको छ । बोर्डको सभाकक्षमा आयोजित कार्यक्रममा बोर्डका अध्यक्ष दिनेश डिसीले चलचित्रकर्मीहरूलाई परिचयपत्र प्रदान गर्नुभएको हो ।

अध्यक्ष डिसीले परिचयपत्र वितरण कार्यक्रम चलचित्रकर्मीहरूको पहिचान, सुरक्षा र सम्मान सुनिश्चित गर्न महत्वपूर्ण कदम भएको बताउनुभयो । ‘यो कदमले चलचित्रकर्मीको पेशागत परिचयलाई औपचारिक मान्यता दिँदै उनीहरूको अधिकार र सुविधामा सहज पहुँच दिलाउनेछ,’ उहाँले भन्नुभयो ।

कार्यक्रममा सहभागी चलचित्रकर्मीहरूले परिचयपत्र प्राप्त गर्न पाउँदा खुशी व्यक्त गर्दै यसले आफ्नो पेशागत पहिचान र सुरक्षामा सकारात्मक प्रभाव पार्ने विश्वास व्यक्त गरेका थिए । कार्डमा क्यूआरसहितको डिजाइन गरिएकाले यसको विश्वशनीयता अझ बढी हुने विश्वास गरिएको छ ।

बोर्डले प्रत्येक वर्ष विशिष्ट चलचित्रकर्मी, चलचित्रकर्मी, विशेष चलचित्रकर्मी र मानार्थ चलचित्रकर्मी शिर्षकमा परिचयपत्र प्रदान गर्ने गरेको छ । परिचय पत्र प्राप्त गर्न चलचित्रकर्मीले बोर्डले आवेदन खुलाएको समयमा आवेदन दिनुपर्ने हुन्छ ।