वासिङ्टन, नोभेम्बर १३, २०२६। विश्वका तीन शक्तिशाली राष्ट्र अमेरिका, रूस र चीनका शीर्ष नेताहरू आगामी साता चीनमा ऐतिहासिक त्रिपक्षीय वार्तामा सहभागी हुने भएका छन्। अमेरिकी राष्ट्रपति डोनाल्ड ट्रम्प, रूसी राष्ट्रपति भ्लादिमिर पुटिन र चिनियाँ राष्ट्रपति सी चिनफिङबीच नोभेम्बर १९ मा चीनको शेन्जेन सहरमा भेटवार्ता हुने अमेरिकी राष्ट्रपति कार्यालय ह्वाइट हाउसले जनाएको छ।
नोभेम्बर १८ र १९ मा आयोजना हुने एसिया प्रशान्त आर्थिक सहयोग संगठन (एपेक) शिखर सम्मेलनका अवसरमा तीन महाशक्तिका नेताहरू एउटै वार्ताको टेबुलमा बस्न लागेका हुन्।
ह्वाइट हाउसकी प्रवक्ता ओलिभिया वेल्सका अनुसार वार्ताको प्रमुख एजेन्डा विश्वव्यापी आणविक हतियार कटौती, आणविक प्रसार नियन्त्रण र अन्तर्राष्ट्रिय सुरक्षा हुनेछ। इरान युद्ध अन्त्य गर्ने विषयमा समेत छलफल हुन सक्नेछ। यद्यपि, अमेरिकी अधिकारीहरूका अनुसार युक्रेन युद्ध यस त्रिपक्षीय वार्ताको औपचारिक एजेन्डामा रहने अपेक्षा गरिएको छैन।
अमेरिका र रूसबीचको प्रमुख आणविक हतियार नियन्त्रण सम्झौता गत फेब्रुअरीमा समाप्त भएपछि नयाँ अन्तर्राष्ट्रिय सम्झौताको आवश्यकता बढेको छ। राष्ट्रपति ट्रम्पले रूससँगै चीनलाई समेत समेटेर नयाँ आणविक हतियार नियन्त्रण सम्झौता गर्ने चाहना व्यक्त गर्दै आएका छन्।
ट्रम्पले चिनियाँ राष्ट्रपति सीसँग छुट्टै द्विपक्षीय वार्ता पनि गर्ने कार्यक्रम छ। तर, ऐतिहासिक त्रिपक्षीय भेटवार्ताबाट तत्काल कुनै ठोस सम्झौता हुने अपेक्षा अमेरिकी अधिकारीहरूले गरेका छैनन्।
चीनले एपेक सम्मेलन र सीका द्विपक्षीय भेटवार्ताको पुष्टि गरे पनि तीन नेताबीचको संयुक्त बैठकबारे छुट्टै औपचारिक घोषणा गरेको छैन।
विश्व राजनीतिमा विशेष महत्त्व राख्ने यो भेटवार्ताले आणविक हतियार नियन्त्रण, इरान युद्ध, अमेरिका-चीन-रूस सम्बन्ध र भावी विश्व शक्ति सन्तुलनमा नयाँ कूटनीतिक सम्भावनाको ढोका खोल्न सक्ने विश्लेषण गरिएको छ।
(१० भाषामा अमेरिकाबाट प्रकाशित, निष्पक्ष, स्वतन्त्र, संसारका १७५ भन्दा बढी देशमा पढिने पत्रिका) Old Archive > 
प्रतिक्रिया