एटलान्टा, अमेरिका / अमेरिका दक्षिणपूर्व क्षेत्रका नेपालीहरूको साझा संस्था Nepalese Association in Southeast America (NASEA) को नेतृत्व फेरिने तयारीका साथ आगामी निर्वाचन तातिएको छ। यसैबीच, संस्थाको अध्यक्ष पदका लागि एक अनुभवी महिला समाजसेवी बिद्या गुरुङको उम्मेदवारीले नासियाको भावी दिशा र पहिचानमा ऐतिहासिक मोड ल्याउने संकेत देखिएको छ।

यदि उनी विजयी भइन् भने नासियाको झन्डै तीन दशक लामो इतिहासमा प्रथम महिला अध्यक्ष बन्ने गौरव उनैले हासिल गर्नेछिन्। यो केवल एक चुनाव मात्र नभई महिला नेतृत्व, अनुभव र समावेशीतातर्फको स्पष्ट संकेत पनि हो।

२५ वर्षको समर्पण: एक प्रेरणादायी यात्रा

बिद्या गुरुङ नासियासँग सन् १९९९ देखि नै आबद्ध छिन्। त्यही वर्ष उनी पहिलो पटक नासियाको कार्यक्रममा सहभागी भइन् र त्यही क्षणदेखि उनले ‘नेपाली घर’ निर्माणको सपना देख्न थालिन्—अमेरिकामा नेपाली समुदायलाई एउटै छातामुनि जोड्ने सपना। सन् २००० मा आजीवन सदस्य बनेपछि उनले संगठनको सदस्यता विस्तारदेखि महिला समिति, सांस्कृतिक कार्यक्रम, पर्वहरू र सामाजिक उत्तरदायित्वका हरेक अभियानमा सक्रिय भूमिका निभाइन्।

उनले दुई कार्यकालसम्म बोर्ड अफ डाइरेक्टर्सको सदस्यका रूपमा कार्य गरिसकेकी छन्। यसबीचमा उनले नासियाको भित्रिदेखि बाहिरसम्मको संरचना, नीति, आवश्यकता र सम्भावनाहरूलाई नजिकबाट बुझ्ने मौका पाइन्।

उम्मेदवारीको घोषणा: दृष्टिकोण र प्रतिबद्धता

बिद्या गुरुङले अध्यक्ष पदमा उम्मेदवारी दिंदै एक भावुक तर स्पष्ट सन्देश दिएकी छन्। उनले भनेकी छन्:

“यो मेरो व्यक्तिगत आकांक्षा होइन, यो मेरो जीवनको दुई दशकभन्दा बढीको सामुदायिक सेवाको निरन्तरता हो। नासियाको नेतृत्वमा म समुदायको आवाज बन्न चाहन्छु—सबै पुस्ता, वर्ग, जात र लिङ्गको प्रतिनिधित्व हुने नेतृत्व।”

उनले आफूले पाएको अनुभव र समुदायबाट प्राप्त सल्लाह तथा समर्थनलाई यो यात्राको मुख्य प्रेरणा बताएकी छन्। उनले पारदर्शिता, संस्थागत सुदृढीकरण, महिला सहभागिता, युवा सशक्तिकरण र आधुनिक प्रविधिको प्रयोगमार्फत नासियालाई नयाँ उचाइमा पुर्‍याउने प्रतिबद्धता जनाएकी छन्।

नयाँ अध्यायको संघारमा नासिया ?

बिद्या गुरुङको उम्मेदवारी नासियाका लागि केवल नेतृत्व परिवर्तनको मुद्दा होइन। यो संस्थाको भविष्य, त्यसको समावेशी संरचना, र नेपाली डायस्पोराको सामाजिक एकताको पुनःपरिभाषा पनि हो।

नासिया आज केवल एक क्षेत्रीय संस्था होइन—यो अमेरिका भरिका नेपालीहरूको आवाज बन्ने यात्रा तय गर्दैछ। यस यात्रामा महिलाको नेतृत्व, दीर्घ अनुभव र सशक्त दृष्टिकोण बोकेकी उम्मेदवारको उपस्थिति नयाँ युगको संकेत हुन सक्छ।

अब हेर्न बाँकी छ—समुदायले के निर्णय लिन्छ?

बिद्या गुरुङका प्रमुख दृष्टिकोण, पहल र प्रतिबद्धताहरू:

संस्थाप्रतिको दृष्टिकोण:

साझा अपनत्व:सबै नेपालीको सामूहिक भावना र आत्मसम्मानलाई उजागर गर्ने।
संस्कृति संरक्षण:हाम्रो मौलिक संस्कृतिलाई बचाउँदै दक्षिणपूर्वी अमेरिकामा बस्ने हरेक नेपालीका लागि अवसरका ढोका खोल्ने।

नासियाको लक्ष्य (मिशन): परम्परालाई प्रभावकारी बनाउने: नेपाली पर्व, सद्भावना भेटघाट, र सामाजिक सेवाका विभिन्न कार्यक्रमहरूलाई अझ सशक्त बनाउने।
जीवनमा उज्यालो ल्याउने: शिक्षा, स्वास्थ्यसेवा, र आपतकालीन सहयोगमार्फत नेपाली परिवारको जीवनमा सकारात्मक परिवर्तन ल्याउने। दीर्घकालीन सम्बन्ध निर्माण:अनुभवी संस्था र नेतृत्वसँग सहकार्य गरी नयाँ प्रतिभाहरूलाई मार्गदर्शन र स्रोत उपलब्ध गराउने।
महिला र युवाको उत्थान:दिदीबहिनी, दाजुभाइ र छोराछोरीका लागि नेतृत्व विकास र मार्गदर्शन कार्यक्रम बनाएर उनीहरूको आत्मविश्वास बढाउने।
सांस्कृतिक मेलमिलाप:अन्य समुदायहरूसँग सहकार्य गरी हाम्रो कथा बाँड्ने र दक्षिणपूर्वी अमेरिकाको विविधतालाई थप समृद्ध बनाउने।

प्रमुख पहलहरू:

करियर मार्गदर्शन:अनुभवी व्यवसायीहरूसँग युवा प्रतिभाहरूलाई जोडेर उनीहरूको आकांक्षा पूरा गर्न मद्दत गर्ने।
कला महोत्सव:वार्षिक रूपमा नेपाली कला, संगीत, नृत्य र पाककला महोत्सव आयोजना गरी हाम्रो संस्कृतिलाई जीवन्त राख्ने।
सहयोग सञ्जाल विस्तार:आवश्यकता परेका परिवारहरूलाई सहयोग, परामर्श र आशा प्रदान गर्न नेटवर्क विस्तार गर्ने।
आर्थिक मार्ग निर्माण:नेपाली उद्यमशीलतालाई प्रोत्साहन गर्न स्थानीय व्यवसायहरूसँग साझेदारी गरी आर्थिक अवसरहरू सिर्जना गर्ने।

नेतृत्व प्रतिबद्धता:

खुलापन: सबैको कुरा धैर्यतापूर्वक सुन्ने र दृढताका साथ काम गर्ने।
पारदर्शिता: हरेक निर्णय र कार्यमा स्पष्टता ल्याउने, ताकि सबै सदस्यलाई संस्थाको गतिविधिबारे जानकारी होस्।
समावेशीपन: हरेक सदस्यलाई देखिने, सुनिने र संस्थाप्रति सबैको अपनत्व महसुस गराउने।

बिद्या गुरुङले यो चुनावलाई केवल एउटा निर्वाचन मात्र नभई हाम्रो संस्कृति र विश्वासलाई बोकेर अगाडि बढ्ने एउटा उज्यालोको खोजी अभियानको रूपमा लिएकी छन्। उनी सबैको माया, सद्भाव र अमूल्य मत पाएर नासियालाई उज्जवल भविष्यतर्फ डोर्‍याउन सक्ने कुरामा पूर्ण विश्वस्त छिन्। उनले आफ्नो विश्वासलाई कमजोर हुन नदिने प्रतिबद्धता पनि व्यक्त गरेकी छन्।