नेपाली पत्रकारिता तथा सञ्चार क्षेत्रमा करिब दुई दशकदेखि सक्रिय पत्रकार सन्दीप पौड्याल ‘यमन ग्लोबल म्युजिक अवार्ड–२०८३’ अन्तर्गत पत्रकारिता विधामा सम्मानित हुनुभएको छ।

यमन इन्टरटेन्मेन्टले शनिबार काठमाडौंमा आयोजना गरेको विशेष समारोहमा पत्रकारिता र सञ्चार क्षेत्रमा उहाँले पुर्‍याएको योगदानको कदर गर्दै पौड्याललाई अवार्ड प्रदान गरिएको हो। समारोहमा प्रमुख अतिथिले खादा, माला र दोसल्लासहित अवार्ड प्रदान गरी उहाँलाई सम्मान गर्नुभएको थियो।

हाल हिमालय टाइम्स दैनिकका उपसम्पादक तथा ई–हिमालय टाइम्सका सम्पादकका रूपमा कार्यरत पौड्याल समाचार लेखन, सम्पादन र सामग्री उत्पादनसँगै गीत लेखन तथा वृत्तचित्र निर्माणमा समेत सक्रिय हुनुहुन्छ। सामाजिक, सांस्कृतिक र समुदाय केन्द्रित विषयमा रुचि राख्ने उहाँले विशेषगरी थकाली समुदाय, बालबालिका तथा विभिन्न सामाजिक सरोकारका विषयमा लेखन र वृत्तचित्र निर्माण गर्दै आउनुभएको छ।

पौड्यालको सञ्चार यात्रा विभिन्न सञ्चारमाध्यमसँग जोडिएको छ। उहाँले यसअघि इमेज टेलिभिजनलगायतका सञ्चार संस्थामा काम गर्दै पत्रकारिता र सामग्री निर्माणका विभिन्न जिम्मेवारी सम्हाल्नुभएको थियो। रेडियो क्षेत्रमा पनि सक्रिय रहँदै उहाँले आईटीसीको सहयोगमा लामो समय ‘कफीका कुरा’ कार्यक्रम सञ्चालन गर्नुभएको थियो।

पत्रकारिताबाहेक सामाजिक विकासका क्षेत्रमा पनि उहाँको अनुभव रहेको छ। गैरसरकारी संस्था स्याण्डस नेपालसँग आबद्ध रहँदा गरिबी निवारण कोष तथा खानेपानीसम्बन्धी परियोजनामा काम गरेको अनुभव उहाँसँग छ। त्यस्तै, ‘इन स्टाइल’ मोडलिङ इन्स्टिच्युट सञ्चालन गर्दै नयाँ मोडलहरूलाई प्रशिक्षण र अवसर प्रदान गर्ने काममा पनि उहाँ संलग्न रहनुभएको थियो।

पत्रकारितालाई मुख्य पेशाका रूपमा निरन्तरता दिँदै गीतसंगीत, वृत्तचित्र, रेडियो तथा सामाजिक क्षेत्रमा समानान्तर सक्रियता देखाउँदै आउनुभएका पौड्यालले विभिन्न कार्यक्रमहरूमा निर्णायकको भूमिकासमेत निर्वाह गर्नुभएको छ।

सम्मानपछि पौड्यालले अवार्डले आफूलाई थप उत्साहित बनाएको प्रतिक्रिया दिनुभएको छ। उहाँका अनुसार यस्तो सम्मानले विगतको कामको मूल्यांकन मात्र नभई भविष्यमा अझ जिम्मेवार र सक्रिय भएर काम गर्ने प्रेरणा पनि थपेको छ।

‘यमन ग्लोबल म्युजिक अवार्ड–२०८३’ समारोहमा संगीत, मनोरञ्जन, सञ्चार तथा सिर्जनात्मक क्षेत्रका विभिन्न विधामा योगदान पुर्‍याएका कलाकार, स्रष्टा, सञ्चारकर्मी तथा अन्य व्यक्तित्वहरूलाई सम्मान तथा अवार्ड प्रदान गरिएको थियो। कार्यक्रममा विभिन्न सांगीतिक तथा मनोरञ्जनात्मक प्रस्तुतिहरूसमेत समावेश गरिएको थियो।