स्वर्ग यदि हुन्छ भने, तिमी स्वर्गमै रमाउनु !

         मरे पछि सम्झिने, सम्मान गर्ने हाम्रो समाजमा, 

सम्झना र सम्मान भइरहेको छ आज सचिनको पनि,  

सामाजिक सञ्जालहरू भरिभराउ छन श्रध्दान्जलीले 

बाल कलाकार सचिन परियारका गुणगानहरूले !

देशका प्रधानमन्त्रीले पनि सम्झिएछन सचिन आज,

शोक समवेदना व्यक्त गरेछन अरूहरूले जस्तै !

सचिन बिहान बेलुका खाना खान नपाएर भोक भोकै हुँदा,

बिरामी भएर उपचार नपाई दश धारा रुँदा

स्कुल जान र पोसिलो आहार खान पाउनु पर्ने उमेरमा 

चल्यो उनको व्यापार, बेचिइरहे सामाजिक सञ्जालहरूमा 

आफ्नै बाबुले त व्यापार गर्थे उनको, अरूको के कुरा गर्नु !

युट्युबर, फेसबुके, टिकटकेहरुमा मात्र कसरी भर पर्नु, 

मेला महोत्सव र प्रदर्शनहरूमा बिकाऊ थिए सचिन,  

लेखेको रहेछ उनलाई उपचार नपाएर अल्पायुमै मर्नु        

सरकार नभएको देशमा, मानवता र धर्म नभएको देशमा 

आफ्नै बाबु र मान्छेहरू व्यापारी बनेर "बालक" बेच्ने देशमा

अब तिमी कहिल्यै जन्मिन नखोज्नु है सचिन, 

स्वर्ग यदि हुन्छ भने, तिमी स्वर्गमै रमाउनु,

तर मानवता नभएको ठाउँमा आउँदै नआउनु !      

- रामप्रसाद खनाल, जनवरी २, २०२५, भर्जिनिया अमेरिका