केही गर्छु भन्ने मान्छे, खुबी भएको मान्छे जहाँ गए पनि, जहाँ भए पनि गर्छ । अघि बढ्छ । यही गरेका छन रुपन्देहीका प्रजिअ गणेश अर्यालले । उनी प्रजिअ भएर गए पछि जिल्ला प्रशासन कार्यालय रुपन्देही देशकै उत्कृष्ट कार्यालय बनेको छ । गृह मन्त्रालय र जिल्ला प्रशासन कार्यालयबिच भएको कार्यसम्पादन सम्झौता बमोजिम उत्कृष्ट कार्य गरेकोले देशभरका ७७ जिल्लामा रुपन्देही प्रथम भएको हो । गृह मन्त्रालयका सचिव र प्रमुख जिल्ला अधिकारीबिच आर्थिक वर्ष २०८०÷०८१ मा भएको कार्यसम्पादन सम्झौता मूल्याङ्कनमा ७७ जिल्लामध्ये जिल्ला प्रशासन कार्यालय रुपन्देहीले ९८ अंकसहित पहिलो स्थान हासिल गरेको हो ।
त्यसैगरी प्रशासन सिंहदरवार विशेष ब्युरोलाई प्राप्त जानकारी अनुसार ९७.७५ अंक ल्याई पाल्पा जिल्ला प्रशासन दोस्रो भएको छ भने तेस्रोमा बागलुङ आएको छ । बागलुङले ९७.६२५ अंक प्राप्त गरेको छ । त्यस्तै चौथो स्थानमा पश्चिम रुकुम जिल्ला प्रशासन कार्यालयले क्रमशः ९७.५ ल्याएको छ भने पाँचौँमा मकवानपुर र पर्वतले ९७.३७५ अंक ल्याएका छन् । पहिलो, दोस्रो, तेस्रो र चौथो चौमासिक रूपमा गरिने मूल्याङ्कनमा छैटौँमा गुल्मी प्रशासन आएको छ । जिल्ला प्रशासन कार्यालय गुल्मीले ९७ अंक ल्याएको छ । त्यसैगरी सातौँमा तेह्रथुम, आठौँमा रोल्पा, नवौँमा सोलुखुम्बु र १० औँ नम्बरमा डडेलधुराले क्रमशः ९६.८७५, ९६.७५, ९६.५६२५ र ९६.४३७५ अंक ल्याएका छन् ।
पहिलो अंक प्राप्त गर्ने रुपन्देही प्रशासनको प्रमुख जिल्ला अधिकारी गणेश अर्याल रहेका छन् । व्यक्तिहरूले अतिक्रमण गरेका सार्वजनिक जग्गा सरकारको नाममा फिर्ता, जिल्ला प्रशासन कार्यालयमा अडियो नोटिस बोर्ड लागू, सीमा क्षेत्रको सुरक्षा व्यवस्थापन प्रणालीलाई आधुनिकीकरण, भारतीय पर्यटकहरूलाई सहजीकरण गर्न सीमा क्षेत्रमा एकीकृत चेकजाँच बिन्दु सञ्चालन तथा साउदी अरबमा मृत्युदण्ड पाएका जनकपुरका रामाशिस यादवको जीवन रक्षाका लागि ब्लड मनी जुटाउनेसम्मका कार्यको नेतृत्व प्रजिअ अर्यालले गरेका थिए ।
एउटै कम्पनीमा काम गर्ने दुर्गाप्रसाद शर्मासँग भएको विवादका क्रममा छुरी प्रहारबाट साथीको हत्या अभियोगमा साउदी अरबको अदालतले सन् २०१८ सेप्टेम्बर ६ तारिखमा यादवलाई दोषी ठहर गर्दै पाँच वर्ष कैद सजाय तोकेसँगै पाँच वर्ष कैद पूरा गरेपछि पीडित परिवारसित ‘ब्लड मनी’ सम्झौता गर्न र पीडित परिवारकासित सम्झौता नभएमा मृत्युदण्ड हुने उल्लेख गरेको थियो । पीडकलाई कडा सजाय हुनुपर्ने भन्दै ब्लडमनीमा सम्झौता नगर्ने अडानमा रहेको पीडित परिवारलाई सम्झाई बुझाई सहमतीकालागि मनाउँदै रुपन्देहीका व्यवसायीको सहयोगमा ४६ लाख बढी रकम जुटाएर प्रजिअ अर्यालले जीवन रक्षा गरेको विषय देशव्यापी रूपमा चर्चा पाएको थियो ।
हामीलाई प्राप्त एक अर्को समाचार अनुसार प्रजिअ अर्यालकै सकृयातामा मुलुकमै पहिलोपटक नेपाल–भारत सीमानाका रुपन्देहीको बेलहियामा वाकथ्रु मेसिन गत महिना देखी संचालनमा ल्याइएको छ । जिल्ला प्रशासन कार्यालय, रुपन्देहीको पहल र सिद्धार्थनगर नगरपालिकाको आर्थिक सहयोगमा बेलहिया नाकामा अत्याधु्निक वाकथ्रु मेसिन राखिएको हो । बेलहियामा रहेको पुरानो गेटको बायाँ तर्फ (भारतबाट नेपाल प्रवेश गर्दा) मेसिन राखिएको छ । सम्भवतः नेपाल–भारत सीमा नाकामा यस्तो मेसिन बेलहियामा राखिएको पहिलोपकट हो । विमानस्थलहरुमा राखिए पनि अन्य नाकामा कतै नभएको प्रशासनले जनाएको छ ।
बुधबार गृह सचिव एकनारायण अर्यालले वाकथ्रु मेसिनको शुभारम्भ गरे । उनले मुलुकको शान्ति सुरक्षा कायम राख्न यस्ता उपकरणले महत्वपूर्ण योगदान दिने जनाए । ‘प्रमुख जिल्ला अधिकारीले नेतृत्व गरेर सीमा क्षेत्रलाई सुरक्षित गराउन गरिएको यो प्रयास सह्रानीय छ’, अर्यालले भने, ‘सबैको सहयोग भयो भने सकारात्मक र दीर्घकालीन काम गर्न सकिन्छ भन्ने यो एउटा उदाहरण हो ।’
उनले सीमा नाकाहरु व्यस्थित बनाउन गृह प्रशासनको तर्फबाट आवश्यक सबै किसिमका काम र सहयोग हुने जनाए । ‘नागरिकको जिउधनको सुरक्षासँगै मुलुकको शान्ति–सुरक्षामा विशेष ध्यान दिएर काम गरिरहेका छौं’, उनले भने, ‘यसका लागि सैब संयन्त्रले चौबीसै घण्टा खटेर काम गरिरहेका छन् ।’ उनले वाकथ्रु मेसिनले अवैध सामान मुलुक भित्रनबाट रोक्ने विश्वास व्यक्त गरे ।
रुपन्देहीका प्रमुख जिल्ला अधिकारी (प्रजिअ) गणेश अर्यालले सीमा नाकालाई व्यस्थित गर्ने प्रयास स्वरुप वाकथ्रु मेसिन राखेर काम गरेको जनाए । ‘भारततर्फ जाँदा एक–एक गरेर वाकथ्रु मेसिनमा जाँच गरेर बल्ल प्रवेश दिइन्छ’, उनले भने, ‘नेकपालतर्फ आउँदा अधिकांशलाई सामान्य जाँच समेत हुँदैन । यसैले अब हरेक व्यक्ति नेपाल आउँदा उसको सम्पूर्ण सुरक्षा जाँच हुनुपर्छ भनेर वाकथ्रु मेसिन राखेका हौं ।’ उनले नेपाल प्रवेश गर्ने सबैलाई जाँच गरिने र भारततर्फ जानेलाई पनि शंका लागे त्यहाँ रहेका सुरक्षाकर्मी वाकथ्रु मेसिनमा जाँच गर्ने जनाए ।
‘मेसिन थिएन र समस्या थियो, मेसिन भएपछि जुनसुकै र जस्तोसुकै व्यक्तिलाई पनि जतिबेला पनि जाँच गर्न सकिन्छ’, उनले भने, ‘यसले रुपन्देहीसँगै अन्य क्षेत्रको सुरक्षालाई पनि मजबुत पार्न थप सहयोग मिलेको छ ।’ प्रजिअ अर्यालका अनुसार चीनमा बनेको यो वाकथ्रु मेसिन अत्याधुनिक छ । यसले दैनिक प्रयोगका वस्तुलाई डिटेक्ट गर्दैन । ‘तर, लागूऔषध, विष्फोटक पदार्थ, सुनचाँदीलाई भने डिटेक्ट गर्छ’, उनले भने, ‘यसले सुरक्षालाई मजबुत पार्दै अवैध सामान भित्रन रोक्ने अपेक्षा छ ।’
सिद्धार्थनगर नगरपालिकाको साढे ५ लाख लगानीमा प्रशासनले वाकथु्र मेसिन खरिद गरेको हो । नगर प्रमुख इश्तियाक अहम्मद खाँले सिद्धार्थनगरबासीलाई सुरक्षित र भयरहित वातावरणमा आफ्नो पेसा–व्यवसाय गर्ने तथा दैनिकी संचालन गर्ने अवस्था सिर्जना गर्न प्रशासनसँग मिलेर काम गरिरहेको बताए । नगरपालिकाका प्रमुख प्रशासकीय अधिकृत जनक थापाले सुरक्षा महत्वपूर्ण विषयवस्तु भएकाले यसमा नगरपालिकाले प्रशासनको आग्रहलाई स्वीकार गरेर मेसिन खरिदमा सहयोग गरेको जनाए ।
सरकारी जग्गा संरक्षणमा डोजर लिएर आफैँ हिँड्छन् रुपन्देहीका सिडिओ
सरकारी जग्गा संरक्षणलाई प्राथमिकता दिएका रुपन्देहीका प्रमुख जिल्ला अधिकारी गणेश अर्याल अतिक्रमित जग्गा खाली गराउन आफैँ फिल्ड पुग्ने गरेका छन् ।
लुम्बिनी सांस्कृतिक नगरपालिका वडा नं. ११ मसिनाका कमलेश्वर पुरी गोश्वामीले अवैधानिक रूपमा कब्जा गरेको जग्गा प्रजिअ अर्याल आफैँ खटिएर खाली गराएका छन् । प्रशासनले संविधान सभा सदस्यसमेत रहेका गोश्वामीलाई जग्गा खाली गराउन निर्देशन दिँदासमेत अटेर गरेपछि प्रजिअ अर्याल डोजर लिएर पुगेका हुन् ।
गोश्वामीले सार्वजनिक जग्गा अतिक्रमण गरेको विषयमा गृह मन्त्रालय र प्रशासन कार्यालय रुपन्देहीमा उजुरी परेको थियो । गोश्वामीले सार्वजनिक जग्गा अतिक्रमण गरेको पुष्टि भएपछि प्रशासनले डोजर लगाएर तारबार हटाएको हो । जिल्ला प्रशासन, नापी कार्यालय, मालपोत कार्यालय र लुम्बिनी सांस्कृतिक नगरपालिकाको प्राविधिक टोलीले जग्गा नाप जाँच गरी अतिक्रमण भएको प्रतिवेदन बुझाएपछि डोजर चलाइएको हो ।
प्रशासन कार्यालयले साविक मसिना ६ ख कि.नं.४०३ सार्वजनिक जग्गा (दक्षिण तर्फ जाने बाटोको) प्रवेश स्थानमा तारबार लगाई ब्लक गरेको देखिएकोले सो तार वार हटाई उक्त जग्गा सर्वसाधारणले समेत प्रयोग गर्न पाउने गरी बाटोको रूपमा कायम गर्न निर्देशन दिएको थियो । साविक मसिना ६ ख कि.नं.४०३ सँग जोडिएको पूर्व र पश्चिम तर्फको दुवै पोखरी सार्वजनिक जग्गा अतिक्रमण गरी निर्माण गरेको देखिएको हुँदा दुवै तर्फको मिचिएको जग्गा छोडी संलग्न नक्सांकन बमोजिम बाटो कायम गरी अतिक्रमित स्थान खाली गर्न र साविक मसिना ६ ख कि.नं.३१६ संग जोडिएको पोखरीको उत्तर तर्फ तार बारले घेरी वृक्षारोपण गरिएको स्पष्ट रूपमा देखिएकोले उक्त तारबार हटाई सार्वजनिक कायम गर्ने भनेकामा गोश्वामीले नगरेपछि प्रशासन एक्सनमा उत्रिएको हो ।
नगरपालिकाकै साविक मसिना ६ ख कि.नं.४०३ सार्वजनिक बाटोको उत्तर तर्फ निजी पोखरी र दक्षिण तर्फ सार्वजनिक बाटोको भाग समेत पर्ने गरी पोखरी निर्माण गरेको र दक्षिणतर्फ पनि सार्वजनिक जग्गा समेत भित्र पर्ने गरी तारबार गरी अतिक्रमण गरेको देखिएकोले नक्सामा कायम रहेको सार्वजनिक बाटो कायम हुने गरी पोखरी तर्फ तटबन्ध निर्माण गर्ने र दक्षिण तर्फको तारबार हटाउन प्रशासन कार्यालयले निर्देशन दिइएकामा अटेर गरेपछि डोजर चलाएर सार्वजनिक जग्गा खाली गरेको हो ।
प्रजिअ अर्यालका अनुसार गोश्वामीले करिब १५ कट्ठा सार्वजनिक जग्गा अतिक्रमण गरी तारबार गरेका थिए । सार्वजनिक जग्गाबाट तारबार हटाएको उनले बताए । उक्त जग्गामा बोर्ड राखेर संरक्षणका लागि लुम्बिनी सांस्कृतिक नगरपालिकालाई जिम्मेवारी दिइएको छ । गोश्वामीले अन्य स्थानमा पनि सार्वजनिक जग्गा अतिक्रमण गरेको उजुरी परेकोले प्रशासनले यसबारे थप अध्ययन गर्दै छ ।
त्यसो त प्रमुख जिल्ला अधिकारी अर्यालले गैर कानुनी रूपमा अतिक्रमण गरिएका सार्वजनिक जग्गा फिर्ता ल्याउन पहल गरिरहेका छन् । भैरहवास्थित गौतम बुद्ध अन्तर्राष्ट्रिय विमानस्थल धावनमार्गको जग्गा, बुटवल उपमहानगरपालिका वडा नं. १७ को रानीगंजमा रहेको सरकारी जग्गा, सिद्धार्थनगर नगरपालिकामा रहेको मृत्यु पश्चात् दाहसंस्कार गर्ने घाट (मसानघाट)को सार्वजनिक जग्गा फिर्ता ल्याउन अर्यालले पहल गरेका थिए ।
‘सार्वजनिक जग्गा संरक्षणमा हामी निर्मम र आक्रामक रूपमा अघि बढेका छौँ,’ उनले भने, ‘प्राप्त भएका सूचना, जानकारी र तथ्यलाई विश्लेषण गरेर प्रशासन अगाडि बढेको छ ।’
सम्बन्धित समाचार: अनधिकृत बोर्ड हटाई सरकारी जग्गा संरक्षण गर्दै रुपन्देही प्रशासन
सम्बन्धित समाचार: मसानघाटको जग्गा व्यक्तिको बनाउनेलाई कारबाही गर्न रुपन्देही प्रजिअ अर्यालको निर्देशन
सम्बन्धित समाचार: विमानस्थल जग्गा प्रकरणमा प्रशासनले हस्तक्षेप नै गरेको हो ः सिडिओ अर्याल
अरु समाचार र बिचार हेर्न तलको लिँक क्लिक गर्नुहोस ।
No comments:
Post a Comment
बेनाममा अरुलाई गाली गलौज गर्दै जथाभाबी कमेन्ट लेख्नेहरु लाई यो साईटमा स्थान छैन तर सभ्य भाषाका रचनात्मक कमेन्ट सुझाब सल्लाह लाई भने हार्दिक स्वागत छ । तल Anonymous मा क्लिक गर्नुश अनी आफ्नो सहि नाम र सहि ईमेल सहित ईंग्लिश वा नेपाली मा कमेन्ट लेखी पठाउनुश, अरु वेबसाईट र यस् मा फरक छ बुझी दिनुहोला धन्यवाद । address for send news/views/Article/comments : Email - info@nepalmother.com - सम्पादक