विराटनगरस्थित अतिथि सदनमा विहिबार भएको विवाहमा दुलहा–दुलहीकै भीड, एकै पटक १५ जोडीले सामुहिक बिवाह गरे

20240419

विराटनगरस्थित अतिथि सदनमा विहिबार भएको विवाहमा दुलहा–दुलहीकै भीड, एकै पटक १५ जोडीले सामुहिक बिवाह गरे

विराटनगर । सामान्यतयाः विवाहमा एक जोडी दुलहा–दुलही हुन्छन्, उनीहरुसँगै हुने जन्ती र घरगाउँले पक्षको उपस्थितीले विवाहमा भीडभाड हुन्छ । तर, विराटनगरस्थित अतिथि सदनमा विहिबार भएको विवाहमा दुलहा–दुलहीकै भीड थियो । त्यहाँ एक जोडी मात्र हैन, एकै पटक १५ जोडीले सामुहिक बिवाह गरेका छन् । सामाजिक सेवाको क्षेत्रमा क्रियाशिल विराटनगरस्थित माहेश्वरी महिला मञ्चले ३० जना युवा–युवतीको सामुहिक विवाह गरिदिएको हो । सामुहिक विवाह गर्नेमा मोरङको जहदा गाउँपालिकाका १२ जोडी छन् भने कटहरी र झापाका युवा–युवती पनि विवाह बन्धनमा बाँधिएका छन् । उनीहरु स्थानीय विराटेश्वर मन्दिरमा भेला भई सिटीरिक्सा चढेर अतिथि सदन आएका थिए । त्यहाँ प्रत्यक जोडीका लागि फरक–फरक जग्गे बनाइएको थियो । उनीहरुलाई पुरोहितले धार्मिक परम्परा अनुसार विवाह गरिदिए । एकै प्रकारको पोसाकमा सजिएका दुलाहा–दुलहीको सामुहिक विवाहले आसपास क्षेत्रका मानिसको ध्यान खिच्यो, उनीहरु अचम्मित भएर सामुहिक विवाहको दृष्यावलोकन गरिरहेका थिए ।

यत्ती ठूलो संख्यामा युवा–युवतीले सामुहिक विवाह गरेको पूर्वी नेपालमा सम्भवत पहिलो घटना भएको धेरैको आकलन छ । सामुहिक विवाहका लागि करिब ६ महिना अघिदेखि तयारी थालिएको थियो । झन्डै ३० लाख खर्च गरेर विपन्न समुदायका युवा–युवतीको विवाह गरिदिएको माहेश्वरी महिला मञ्च विराटनगरकी अध्यक्ष पुनम राठीले जानकारी दिइन् । मञ्चको तर्फबाट दुलहीलाई १ थान सुनको तिलहरीसहित सुनचाँदीका गहना, दराज, ओढ्ने÷ओछ्याउँने कपडा लगायत सामाग्री प्रदान गरियो । दुलहीको नाममा ५ बर्षसम्मका लागि एघार हजारको मुद्दती खाता पनि खोलिएको छ । बैंक खातामा रहेको पैसा ५ वर्षपछि मात्र झिक्न पाउने व्यवस्था मिलाइएको मञ्चले जनाएको छ । सामूहिक विवाहमा पुगेकी विराटनगर महानगरपालिकाकी उपप्रमुख शिल्पा निराला कार्की, जहदा गाउँपालिकाका अध्यक्ष जितेन्द्र प्रसाद साह र उद्योगी महेश जाजुले मञ्चले विपन्न समुदायका युवायुवतीका लागि पुन्यको काम गरेको भन्दै खुलेर प्रशंसा गरेका छन् ।