- टंक प्रसाद पन्थ 
समय बदलियो वा
मान्छे बदलियो आज
म केही खुट्याउनै सकिन बा !
अपशकुनकाे बेला छ
मनसुन लयमा छैन
भनसुन देखिन्छ यत्रतत्र
गुन खोजेर कहाँ पाउनु ?
कर्तव्यले काम गर्दैन अहिले
अहिले जमाना धेरै फेरिएको छ बा !
सद्भाव र सामूहिकता देखिन्न अचेल
ममता र भ्रातृत्व कतै भेटिन्न अचेल
पर्म र पैँचोका कुरा एकादेशका कथा भए बा !
पहाडका गर्विला बस्तीहरू
अहिले निराशामा बाँचिरहेका छन्
बृद्धबृद्धाहरू एक्लै सपना साँचिरहेका छन्
सन्तानहरू त खुसी देखिन्छन्
विदेशी भूमिमा गर्वले हाँसिरहेका छन्
आफ्नै बाअामाकाे अन्त्येष्टिमा
सहभागी हुन
समय मिल्दैन उनीहरूलाई
लाग्छ, के तन्त्रमन्त्र पढाएको छ त्यो विदेशले ?
वा कतै
घण्टाको हिसाबको जन्त्रमा कुदिरहेका उतै ?
अथवा
डलरकै हिसाब गर्छन् र लत्याइदिन्छन् कर्तव्यलाई ?
अहिले देशमा युवाहरू बस्नै चाहन्नन् बा !
सरकारमा बस्नेले जागिर मात्र खान्छन् रे
रीतिथिति धेरै फेरिएका छन् बा आज !
अहिले गाउँमा पनि परिवर्तन आएको छ
भोक मीठो मान्ने कोही छैनन्
जिब्रोका लागि मात्र मीठो भए हुन्छ
घरमा फलाउन पर्दैन
फलाइदिन्छ मित्रराष्ट्रले अब
घर हामीले चलाउनु पर्दैन बा !
सबै अर्कैले चलाइदिन्छ
अहिले सबैलाई सुख्ख छ बा !
पैसा भए आमा किन्न पाइन्छ यहाँ
त्यति मात्र कहाँ !
पैसाका लागि आमा बेच्न पाइन्छ यहाँ !
सबै पैसाकै पछि दौडेका छन् बा !
मौसम पनि बदलिएको छ
साउनमा पानी पर्दैन
वैशाखमै बाढी पहिरो जान्छ
चालचलन बदलिएको छ
परिश्रम गर्ने बानी छैन मानिसमा
हजुरले आर्जेको खोलाकै राजा खेत
हेर्दाहेर्दै बाँझो पल्ट्यो बा !
जीवनकै प्रतिष्ठा बनाएर जोडेको बारीमा
अहिले झाडी जङ्गल छ बा !
जहाँ अझै पनि हजुरका पसिनाको सुवास भेट्छु म
हजुरले दारपात र ढुङ्गा बोकेर बनाएको
हाम्रो आस्थाको घरमा ताला लागेको छ बा !
खण्डहर बन्दै छन् संरचना
बिँडो थाम्न सकेनौँ हामीले हजुकाे
हजुरले कमाएको सह छैन बा आज
हजुरले उठाएको अभिमान झुक्दै छ बा !
हजुरले पुण्य प्राप्तिका लागि लगाएका
वर, पीपल, समीका रूख सबै
डोजरले ढालाइदियाे बा !
हामी भौतिक सुखका पछि दौडेका छौँ
बसाइ सर्नकै लागि मोटर बाटो खनेछाैँ हामीले,
साँच्चै लाछी भयौँ हामीहरू बा !
जोगाउन सकेनौँ हजुरको त्यो विरासत
हामी नै त्यस्तो अभागी पुस्ता हाैँ बा !
गुमाउँदै छौँ आफ्ना गौरव
एक पेट खानकै लागि
बेच्दै छौँ निष्ठा लिलामीमा
देश बर्बाद हुँदा पनि
मूकदर्शक बनेर हेर्छौँ रमिता
स्वार्थका लागि लम्पसार बन्न तयार छौँ हामी ।
सुन्दा नमिठो लाग्ला बा !
गुन्दा मनमा चिसो पस्ला
नालायक सन्तानप्रति खेद जाग्ला
कुपुत्र जन्माएकोमा पश्चात्ताप होला
त्यो पवित्र मन पीडाले राेला
माटोको ममताले हृदय छाेला
तर पनि
बाध्यतालाई बुझिदिनुहाेला बा !
अनजान सम्झेर
याे नादान हाे भनेर
मलाई क्षमा दिनुहाेला बा !
मलाई क्षमा दिनुहाेला बा !!
No comments:
Post a Comment
बेनाममा अरुलाई गाली गलौज गर्दै जथाभाबी कमेन्ट लेख्नेहरु लाई यो साईटमा स्थान छैन तर सभ्य भाषाका रचनात्मक कमेन्ट सुझाब सल्लाह लाई भने हार्दिक स्वागत छ । तल Anonymous मा क्लिक गर्नुश अनी आफ्नो सहि नाम र सहि ईमेल सहित ईंग्लिश वा नेपाली मा कमेन्ट लेखी पठाउनुश, अरु वेबसाईट र यस् मा फरक छ बुझी दिनुहोला धन्यवाद । address for send news/views/Article/comments : Email - info@nepalmother.com - सम्पादक