कविता : आगो सल्किसकेको छ !

लुटको लङ्कामा 

अपराध र अनैतिकताको लङ्कामा 

आगो सल्किसकेको छ 

डढेलो सुरु भैसकेको छ 

नहोस् पनि कसरी ?

वैशाख जेठको धूपमा ! 

पूर्वको धरानबाट 

पश्चिमको धनगढीबाट

देशकै मुटु काठमाडौँबाट 

यसै गरी ठाउँ ठाउँ 

र, गाउँ गाउँबाट  

देखिइसकेको छ आगोको झिल्का

सल्किँदै छन् लुटेर बनाइएका,

परालका टौवाहरू

मकैका सुलीहरू

धन र धानका धनसारहरू 

सुन र चाँदीका बन्द बाकसहरू 

आगो पहिलै लागिसक्नु पर्ने थियो 

ढिलो भएकै हो शङ्कै छैन  

मौसम त्यति अनुकूल नभएर होला 

वा, 

सलाई कोर्नेहरूको ढङ्ग नपुगेर होला 

सलाई का कैयौँ काँटीहरू खेर पनि गए 

सोंचेकाहरु बाट सलाई नपरे पनि

नसोचेका हरूले, नपत्याएकाहरुले 

सलाई कोरिरहेका छन् 

आगो पारिरहेका छन् 

जलाइनै पर्ने फोहोरका डुङ्गुरहरू 

ढिला भएकै हो जलाउन 

गाउँ देखी सहर सम्म फैलिएकै हो दुर्गन्ध

तर 

लुटको लङ्का मा

फोहोरका डुङ्गुरहरू मा 

 ढिलै भए पनि 

आगो लागिसकेको छ 

डढेलो लागिसकेको छ 

हजुर बा का पालाका जीर्ण दमकलहरू 

के सक्थे यो आगो र डढेलो निभाउन 

त्यसमाथि,

उद्घाटन भैसकेको मेलम्चीको पानी

झरे पो धारामा, भरिने होलान् दमकल 

तर मेलम्ची आफै जलिरहेको छ पानी खोज्दै 

त्यसैले

यो आगो, यो डढेलो,

देखिँदैन रोकिने

देखिँदैन छेकिने  

पानी बिनाका दमकलहरू 

साइरन बजाउन जतिसुकै 

छैन कुनै माने 

आगो सल्कियो, निभ्ने छैन जाने 

समयमै किनारा लाग्नु 

आगोले खरानी पार्न सक्छ भाग्नु 

नजिक बस्दै नबस्नु आगो को 

आगो हो पोल्छ, जलाउँछ

त्यसैले आगो सँग खेल्दै नखेल्नु !

- रामप्रसाद खनाल, May 22, 2022

***

प्रतिगामी केटो ! - रामप्रसाद खनाल

हो त्यो प्रतिगामी नै हुनु पर्छ

राजाकै मान्छे हुनु पर्छ

नभए शाह थर किन भयो उसको ?

कालो चस्मा लगाउँछ किन त्यसले ?

काठमाडौँ बनाउँछु भन्छ किन त्यसले ?

नेपालको झन्डा किन बोक्छ त्यसले ?

लौरो उठाउँछ र सेक्छ हरेक वडाहरूमा,

रैथाने भाउजू र दाइलाई लखेट्छ किन त्यसले ?

मलाई पनि शङ्का लागेको छ उ माथि

खान्न भन्छ, खान दिन्न भन्छ

यस्ताको पनि कहीँ भर गर्न हुन्छ ?

सेटिङमा चल्ने राजमा,

यो बबुराको कुरा कसले सुन्छ ?

मिटिङहरू पनि कहीँ लाइभ गर्न हुन्छ ?

खुबै जान्ने भएको दारी केटो !

न त कुनै मुद्दा लागेको छ

न त जेल बसेको छ

न त रेणुका बाउ छोरीहरू जस्तै,

कहिले यता, कहिले उता पसेको छ !

न त नातावाद र कृपावादमा विश्वास गर्छ

यस्तो बकम्फुसे पनि कहीँ मेयर हुन्छ ??

हो त्यो प्रतिगामी नै हुनु पर्छ

राजाकै मान्छे हुनु पर्छ

नत्र कालो चस्मा किन लाउनु पर्छ ?

मलाई पनि शङ्का जागेको छ

काङ्ग्रेस एमाले माओवादी वा कुनै दलबाट,

विश्वास लाग्थ्यो उठेको भए

तर उ स्वतन्त्र किन उठ्यो ?

लौरो लिएर किन उठ्यो ?

मलाई पुरै शङ्का लागेको छ

प्रतिगामी नै हो भन्ने शङ्का जागेको छ !

- रामप्रसाद खनाल, May 21, 2022

अरु समाचार र बिचार हेर्न तलको लिँक क्लिक गर्नुहोस ।

 NepalMother.com

GO TO HOME PAGE

click on this logo for home page