हो म निर्वस्त्र छु - सरस्वती तिमिल्सिना

मलाई के को लाज,
के को सरम ???
म पतन भई सकेको छु
मलाई अलिकति पनि खसिएला
भन्ने के को डर ?
म उज्यालो सँग मात्र डराउँछु
र त मध्यरात पर्खिन्छु
नाँगो नृत्य गर्न !
मेरो विवेक हराएको उहिल्यै हो ,
म शहरमा खोजेर कहाँ पाउँछु
पह्रारै जँगलमा हराएको हो मेरो सम्वेदनशिलता !
मेरो शरिरमा बेरिएको कात्रोले
कहाँ छोप्छ र म भित्रको कुरुपतालाई
हो , म उस्तै छु
जस्तो तिमीले मलाई चिन्दा थिएँ
म परिवर्तन भएको होईन
तिमीले मलाई
फरक तरीकाले बुझ्न खोज्यौ !
मेरो टाउको परिवर्तन भएको छैन
न त्यहाँ भित्रको दिमाग फेरिएको छ
अनि ,
किन फरक देख्न चाहन्छौ तिमी मलाई ?
म उही टाउको
उही दिमागबाट निर्देशित छु
र म उही पुच्छर हल्लाई रहेको छु