लेउ खुरुक्कन, अब तिम्रो दिने पालो ! - स. ज. क

मेरी आमाको छातीमा 

तिम्रा गम्बूटहरुले परेड खेल्दा

“म” चुप-चापै थिंए,

मेरो घर पछाडीको झाडीमा

 तिम्रा निशानाहरु तिखारिदा

 “म” चुप-चापै थिंए,

तिम्रा आयातित गोला-बारुदले 

मेरो शान्ति एम्बुषमा 

पटक पटक पारिंदा पनि

 “म” चुप-चापै थिंए,

हेरौंन त यो कथित क्रान्ति पनि भन्ने लाग्यो, 

हेरौंन त यो कथित क्रान्ति पनि भन्ने लाग्यो,

छिमेकीको घर उजाडिदा पनि

 “म” निर्लज्ज चुप-चापै थिंए,

डाँडा घरे गुरुबालाई रुखमा बाँधी

 तिम्रा टट्टूहरुले ठोक्दा पनि

 “म” केहि नबोली चुप-चापै थिंए,

बुढा-बुढीको टेक्ने लौरो भाँचिदा,

चेलीको सिन्दुर पुछिदा ,

एउटी छोरीले आमा गुमाउदा,

एउटा छोरोले बा गुमाउदा,

दुधे बालक आमा भन्न नसिक्दै अनाथ हुदा

नाबालक भोक-प्यासले छट्टपटिदा पनि

 “म” चुप-चापै थिंए, 

तिमीले क्रान्तिको साटो

 बुझेको जम्मा मोलको हिसाब गर्दै-गर्दा सम्म

 म चुप-चापै थिंए,

तिमीले बुझिलिएको जम्मा मोलको हिसाब गर्दै-गर्दा सम्म

 म चुप-चापै थिंए,

 आजसम्म टोटलमा

 तिम्रा क्रान्तिको हजारौ-लाखौँले अनमोल मोल तिरिसके , बाबै !

तिम्रा क्रान्तिको हजारौ-लाखौँले अति नै चर्को मोल तिरे |

घरले तिर्यो,

गराले तिर्यो,

खेतले तिर्यो,

बनले तिर्यो,

हिमालले तिर्यो,

पहाडले तिर्यो,

फाँटले तिर्यो,

रास्ट्रैले तिर्यो,

मेरी आमाको छातिले पनि तिर्यो|

सक्नेले नोटमा तिरे,

कसैले भोटमा तिरे,

कसैले पछि लागेरै तिरे ,

कसैले चुप लागेर तिरे ,

कसैले सहेर तिरे,

कसैले रोएरै तिरे,

कसैले इमानले तिरे,

सक्दै नसक्नेले “ज्यान” मा तिरे|

 तिम्रो क्रान्तिको हजारौ-लाखौँले अनमोल मोल तिरे |

तिम्रो क्रान्तिको हजारौ-लाखौँले चर्को मोल तिरे |

 अब तिम्रो दिने पालो,बाबै,

अब तिम्रो दिने पालो,

लेउ खुरुक्कन, अब तिम्रो दिने पालो!

अब तिम्रो दिने पालो ,

लेउ खुरुक्कन, अब तिम्रो दिने पालो!

“हाम्रो पनि आज नगद कल उधार !!!”