‘प्रचण्ड मूर्दावाद’ लेखिएको प्लेकार्ड बोकेकाहरु माओवादीविरुद्ध प्रदर्शनमा, प्रचण्डको पुत्ला पनि जलाइयो

एकीकृत नेकपा माओवादीको पोस्टरमा भारतको राष्ट्रिय झण्डा जुत्तामुनि राखिएको आक्रोशमा सीमावर्ती जोगवनीका नागरिक माओवादीविरुद्ध प्रदर्शनमा उत्रिएका छन्। दश गजा क्षेत्रमा मङ्गलबार बिहानैदेखि उनीहरु माओवादीविरुद्ध उत्रिएपछि दुबैतिरको सीमामा सुरक्षाकर्मी तैनाथ गरिएको छ। राष्ट्रिय जागरण भण्डाफोर अभियानअन्तर्गत माओवादीले मोरङको सीमावर्ती इलाकामा टाँसेको पोस्टरमा ‘भारतको राष्ट्रिय झण्डा’ लाई एक व्यक्तिले जुत्ताले कुल्चने प्रयास गरिरहेको देखाइएको छ। भारतीयहरु बिरोधमा उत्रिएपछि जोगवनीमा रहेको उप–महानगरपालिकाको ढाटमा टाँसिएको उक्त पोस्टर च्यातिदिएको छ। पोस्टरमा देखाइएको.....
दृश्यले भारतीयको अपमान गरेको भन्दै जोगवनीबासीले बिहानैदेखि सडक अवरुद्ध गरेर माओवादीबिरुद्ध प्रदर्शनमा उत्रिएपछि उक्त क्षेत्रको स्थिति तनावपूर्ण बनेको छ। भारतीय सीमा सुरक्षा बल (एसएसबी) र बिहार प्रहरीले प्रदर्शनकारीलाई उत्तेजित नहुन सम्झाइरहेको छ भने नेपाल प्रहरी र सशस्त्र प्रहरीको तैनाथी नेपाली सीमा क्षेत्रमा बाक्लो पारिएको छ।

पूर्व क्षेत्रीय प्रहरी कार्यालय विराटनगरका प्रमुख डिआइजी भिष्म प्रसाईले गतिरोधका विषयमा गृह मन्त्रालयलाई जानकारी गराइसकिएको बताए। उनले भने- कूटनीतिकतवरले गतिरोध अन्त्य हुने भएकाले स्थितिबारे मन्त्रालय जानकार भइसकेको छ। भारतीयहरुले ‘भारतविरोधी गतिविधि बन्द गर’ र ‘प्रचण्ड मूर्दावाद’ लेखिएको प्लेकार्ड बोकेका छन्। उनीहरुले माओवादी अध्यक्ष पुष्पकमल दाहालको पुत्ला पनि जलाएका छन् भने दाहालविरुद्ध कडारुपमा प्रस्तुत भएका छन्।