माओवादी बिनाको सरकारको कुनै अर्थ र औचित्य छैन : एमाले उपाध्यक्ष वामदेव गौतम

बामदेवको माओवादी भाषा सुनेर सबै दंग !

नेकपा एमालेका उपाध्यक्ष वामदेव गौतमले मुलुक सरकारविहीन अवस्थामा रहेको बताएका छन्। नेकपा एमाले डोटीको जिल्ला अघिवेशन उद्घाटनका लागि जाने क्रममा डडेलधुरा आइपुगेका उपाध्यक्ष गौतमले वर्तमान सरकार हुनु र नहुनुमा कुनै भिन्नता नरहेको आरोप लगाए। उनले भने- 'सिंहदरबारमा मात्र सरकार भएर हुँदैन, सिंहदरबारबाहेक कसैले सरकार भएको अनुभूति गर्नपाएका छैनन्, माओवादीबिनाको सरकारको कुनै अर्थ र औचित्य छैन, हामी माओवादीसहितको राष्ट्रिय सरकारका पक्षमा छौं।' उपाध्यक्ष गौतमले सञ्चारकर्मीको जिज्ञासामा भने - 'तुरुन्त माओवादीसहितको सरकार नबने मुलुक ठूलो दुर्घटनामा पर्नसक्छ।' अर्को एक प्रसङ्गमा उनले आफ्नो जीवनको प्रमुख लक्ष्य नेपालका वामपन्थीहरुको एक पार्टी बनाउने ऐतिहासिक काममा लागिपरेको बताए। मुलुकको सबैभन्दा ठूलो पार्टीलाई सरकार बाहिर राखेर संविधान बन्नसक्दैन-उनको भनाइ थियो।