माओवादीले गणराज्य घोषणा गरी देशमा मुठभेड गराउन खोजेकोछ : प्रधानमन्त्री

प्रधानमन्त्री माधवकुमार नेपालले माओवादीले गणराज्य घोषणा गरी देशमा मुठभेड गराउन खोजेको बताएका छन् । उनले उनले गणराज्य घोषणा गर्नु शान्तिसम्झौताविपरीत रहेको टिप्पणी गरे । निर्माण व्यवसायी संघको साधारणसभा उद्घाटन गर्न जाने क्रममा नेपालगन्ज विमानस्थलमा सञ्चारकर्मीसँग कुरा गर्दै शुक्रबार प्रधानमन्त्री नेपालले भने, 'आफूलाई सबैभन्दा जिम्मेवार बताउने दलले गैरराजनीतिक कार्य गर्दै छ ।'
उनले राजनीतिक गतिरोध अन्त्य गर्न छलफल चलाउने बताए । गणराज्य घोषणा गर्नुअघि माओवादीसँग राजनीतिक सहमति हुने पनि प्रधानमन्त्री नेपालको विश्वास थियो । प्रधानमन्त्री नेपालले प्रमुख जिल्ला अधिकारीलाई मन्त्रीले कुटेको प्रसंगमा कृषि राज्यमन्त्री करिमा बेगमले माफी मागिसकेको बताएर पन्छिए । 'मन्त्रीले माफी मागिसकिन् । माफी पनि ठूलो सजाय हो,' उनले भने । यता नेपाली कांग्रेसका कार्यवाहक सभापति सुशील कोइरालाले स्वायत्त गणराज्य घोषणाको निर्णय मुलुकका लागि घातक हुने बताएका छन् । नेपालगन्ज विमानस्थलमा आयोजित छुट्टै पत्रकार सम्मेलनमा उनले आफूखुसी गरिएको स्वायत्त गणराज्य घोषणाले जाति-जातिबीच संषर्घ चर्किने टिप्पणी गरे । माओवादीको गलत माग पूरा गर्न सरकार र अन्य राजनीतिक दल बाध्य नहुने उनको भनाइ थियो । 'माओवादीले उठाएको मागका विषयमा वार्ताबाट सहमति खोजिन्छ । तर, राष्ट्रपतिलाई लान्छना लगाउने विषयमा सहमति हुनै सक्दैन,' उनले भने ।