प्रचण्डले वर्तमान सरकार छिटै ढल्ने बताए

एकीकृत नेकपा माओवादीका अध्यक्ष पुष्पकमल दाहाल (प्रचण्ड) ले वर्तमान सरकार छिटै ढल्ने बताएका छन् । काङ्ग्रेस सभापति गिरिजाप्रसाद कोइरालालाई सिङ्गापुरमा भेटेर बुधबार दिउँसो स्वदेश फर्किएलगत्तै प्रचण्डले सञ्चारकर्मीमाझ भने- "अप्राकृतढङ्गले बनेको सरकार छिटै ढल्दैछ ।" कोइरालालाई भेटेपछि प्रचण्डले नयाँ सरकार गठनको दावी गर्नुलाई महत्वका साथ हेरिएको छ ।उनले काङ्ग्रेस सभापति कोइराला पनि राजनीतिक गतिरोध अन्त्य हुनेमा विश्वस्त भएको बताए । कोइराला र प्रचण्डबीच मङ्गलबार भएको भेटमा राष्ट्रपतिको कदमका सम्बन्धमा मध्यमार्गी बाटो अपनाउने सहमति भएको थियो । "तर खाकाका बारेमा भने छलफल हुन बाँकी छ"- उनले भने ।