राजधानी काठमाडौं अपहरणकारीको राजधानी बन्दै, डलरमा फिरौती तिरेर अपहरणकारीको चंगुलबाट मुक्त

प्रतिष्ठित औद्योगिक प्रतिष्ठान जगदम्बा स्टिलका सञ्चालक सञ्जय सुरेश डलरमा फिरौती तिरेर अपहरणकारीको चंगुलबाट मुक्त भएका छन् । दुई साताअघि सारडा ग्रुपका महेश सारडा पनि फिरौती तिरेर उम्किएका थिए । दुई सातामा अपहरणमा पर्ने सञ्जय सुरेश दोस्रो घरानिया व्यापारी हुन् । तस्बिरमा सुरेशको कमलपोखरीस्थित निवास जहाँ अपहरणकारीले पटक-पटक फोन गरे तर फरक-फरक नम्बरबाट । २८ जेठमा तीनकुनेबाट अपहरणमा परेका व्यापारी सुरेश दुई लाख डलर -करिब डेढ करोड नेपाली रुपैयाँ) फिरौती तिरेर रिहा भएका छन् । कमलपोखरीनिवासी सुरेशको परिवारले चारवटा बि्रफकेसमा रकम भरेर अपहरणकारीलाई हुन्डीमार्फत दुबई पठाएपछि उनी शनिबार बिहान रिहा भएका हुन् ।

प्रहरी स्रोतका अनुसार उनी शनिबार बिहान सात बजे आफ्नो घर आइपुगेका थिए । उनलाई अपहरणकारीहरूले त्रिपुरेश्वरसम्म ट्याक्सीमा ल्याएर रिहा गरेका थिए । अपहरणकारीहरूले व्यापारी सुरेशको अपहरण गरेलगत्तै उनको परिवारसँग टेलिफोनमार्फत रकम डिल गरेका थिए । उनीहरूले व्यापारीको परिवारसँग कुरा गर्दा चोरीका मोबाइल नम्बरहरू प्रयोग गरेका थिए ।
जानकारी पाएलगत्तै महानगरीय प्रहरी अपराध महाशाखाको एन्टी किड्न्यापिङ सेलको टोली सुरेशको खोजीमा जुटेको थियो ।
प्रहरी स्रोतका अनुसार सुरेशको अपहरण नयाँ समूहले गरेको हो । अपहरणकारीले आफैंले रकम नलिएर हुन्डीमार्फत दुबईमा पठाउन लगाएका थिए । स्रोतका अनुसार अपहरणकारीहरूले हुन्डीबाट पठाउने रकम व्यापारी सुरेशकै चिनजानको व्यक्तिको नाममा दुबईमा पठाउन लगाएर उनीमार्फत आफूले भुक्तानी लिएका थिए ।

अनुसन्धानमा संलग्न एक प्रहरी अधिकारीका अनुसार उनीहरूले अपहरित परिवारका सदस्यहरूसँग फोनमा डिल गर्दा छिनछिनमा फोन नम्बर परिवर्तन हुन्थ्यो । एक अधिकारीले भने, 'अपहरणकारीले फोनमा कुरा गर्दा नेपालको नम्बर देखिन्थ्यो । तर, त्यहीवेला अपहरितसँग कुरा गर्दा उनको टेलिफोनमा भारतीय नम्बर डिस्प्ले हुन्थ्यो ।' प्रहरी स्रोतका अनुसार अपहरणकारी आधुनिक सञ्चार प्रविधिका जानकार रहेका र उनीहरूले प्रहरीलाई चक्मा दिन प्रविधि दुरुपयोग गरेका थिए । सुरेश मुक्त भएलगत्तै अनुसन्धानमा खटिएका प्रहरी अधिकारीहरू कमलपोखरीमा रहेको उनको निवासमा आएर उनीसँग भेटघाट गरेका थिए । तर, सुरेश परिवारले प्रहरीलाई अपहरणको बारेमा सबै जानकारी दिएको छैन । स्रोतका अनुसार अपहरित सुरेशले प्रहरी टोलीलाई आफूले अपहरणबाट मुक्त हुन बुझाएको रकमसमेत खुलाउन मानेका छैनन् ।

जेठ महिनामा अपहरणमा परेका सुरेश दोस्रो व्यापारी हुन् । यसअगाडि अपहरणकारीहरूले सारडा समूहका उद्योगी महेश सारडाको अपहरण गरेका थिए । आफ्नै ड्राइभरको सहयोगमा थापाथलीमा रहेको आफ्नै घरबाट अपहरणमा परेका सारडा अपहरणको आठ दिनपछि १४ लाख फिरौती बुझाएर रिहा भएका थिए । प्रहरीले व्यापारी सारडाको अपहरणमा संलग्न ६ जना नेपालीलाई पक्राउ गरिसकेको छ । अपहरणमा संलग्न तीनजना भारतीय भारतमा पक्राउ परेका छन् । २२ जेठमै अपहरणमा परेकी १९ वर्षीया विद्यार्थी ख्याति श्रेष्ठको भने हत्या भएको थियो । पारिवारिक चिनजानका शिक्षकबाट अपहरणमा परी हत्या गरिएकी ख्यातिका अपहरणकारी वीरेन श्रेष्ठ र उनकी सहयोगी मेरिना शाक्यलाई प्रहरीले १५ दिनपछि काठमाडौंमा पक्राउ गरेको थियो । यसरी पछिल्लो समयमा राजधानी काठमाडौं अपहरणकारीको राजधानी बन्दै गएको छ । - from Naya patrika