काँग्रेस र एमालेका कार्यकर्तालाई आत्मसमर्पण गर्न वा गाउँ छाड्न सूचना जारी

रामेछाप एकिकृत नेकपा माओवादीले दुरागाउँ गाविसका काँग्रेस र एमालेका कार्यकर्ताको नाम कालो सूचीमा प्रकाशित गरी उनीहरुलाई आत्मसमर्पण गर्न वा गाउँ छाड्न सूचना जारी गरेको छ। सो पार्टीले काँग्रेस र एमालेका कार्यकर्तालाई गाउँ छाड्न उर्दी जारी गरेको घटना सेलाउन नपाउँदै फेरि ४ जनाविरुद्ध गाउँमा सूचना टाँस गरिएको छ। एकिकृत माओवादी २ नं एरियाअन्तर्गत दुरागाउँ गाविसको नामबाट जारी गरिएको सूचनामा दुरागाउँ गाविस-३ का देवीबहादुर थापा वडा नं ४ का पशुपति कार्की तथा वडा नं-७ का रमेश वाग्ले र हरिकुमार सुनुवारलाई काँग्रेस र एमालेका भरोटे भएको भन्दै गाउँ छाड्न वा आत्मसमर्पण गर्न भनिएको छ। ठाउँठाउँमा टाँस गरिएको सूचनामा लेखिएको छ- 'विद्यमान परिपे्रक्ष्यमा नेपालको राष्ट्रियता र स्वाभिमानविरुद्ध केही प्रतिक्रियावादी तथा यथास्थितिवादी र विदेशी साम्राज्यवादीको दलाल भई नेपाली स्वाभिमानमाथि हमला गरिरहेकाले ती निम्न काँग्रेस एवं एमालेका भरौटेहरु समयमै सुध्रिएर आत्मसमर्पण गर्ने वा गाउँ छाड्ने यो कालो सूचीसहितको सूचना जारी गरिएको छ।'सूचनाको अन्त्यमा नोट भन्दै लेखिएको छ- 'प्रतिक्रियावादीको कित्तामा उभिने व्यक्ति वा पार्टीका कार्यकर्ताको नाम पनि क्रमशः कालो सूचीमा राखिँदै जानेछ।'

सो सूचनाको एक प्रति एमाले जिल्ला पार्टी कार्यालयमा पनि आइपुगेको एमाले रामेछापका प्रचार विभाग प्रमुख तुलप्रसाद कँडेलले बताए। माओवादीको यो कार्य निरंकुश र फाँसिवादी चरित्रको नमुना भएको एमाले पोलिटब्युरो सदस्य पशुपति चौलागाईले टिप्पणी गरेका छन्। यसबारे माओवादीले भने केही नबताएको स्थानीय पत्रकार नवराज पथिकले बताए। यसअघि माओवादीका जिल्ला सहइन्चार्ज राजन दाहालले जिल्ला पार्टीको नामबाट विज्ञप्ति जारी गरी एमाले र काँग्रेसका गाउँ कमिटीसम्मका कार्यकर्ताले गाउँ नछाडे जनकारबाही गर्ने चेतावनी दिएका थिए।


के पी ओलीका

४४ रोचक घोचक तीर

१. 'वनमाराको झाडीमा पीपलको बिरुवा छोपियो भनेर पीपल हरायो भन्न मिल्दैन । एमाले पीपलको बिरुवा हो, माओवादी वनमाराको झाडी । पीपल रूख बनेपछि वनमारा आफैं खुइलिएर जान्छ । ' (माओवादी ठूलो पार्टी भए पनि एमाले कम्युनिस्ट आन्दोलनको मूलधार रहिरहने तर्क गर्दै ।)

२. 'हात्ती दुब्लाएर बोरामा अट्दैन, मुसो मोटाएर हात्ती हुँदैन' (संविधानसभामा एमाले तेस्रो पार्टी भएपछि दिएको प्रतिक्रिया)

३. 'छोराको तिघ्रा बढेपछि बाबुलाई अभिभावक होइन भन्न मिल्दैन । माओवादीलाई यहाँसम्म ल्याएको एमालेले हो । उसलाई सुधार्न एमालेले गरेको आलोचनालाई विरोध नसम्झोस् ।' (आफूलाई माओवादीविरोधी नठान्न अनुरोध गर्दै)

४. 'झुम्रा, कागज र अरू मटेरियल त पहिलै थिए, तर ती पहिलै थिए भनेर मैले पुतली बनाएँ भन्न मिल्दैन । जसले सबै मटेरियललाई मिलाएर पुतली बनाउन सिकायो, त्यो उसैले बनाएको भन्नुपर्छ ।' (पार्टीको मार्गदर्शक सिद्धान्त जनताको बहुदलीय जनवाद आफ्नो कार्यकालमा विकास भएको पार्टी अध्यक्ष झलनाथ खनालको भनाइलाई खण्डन गर्दै मदन भण्डारीको अगुवाइमा जबज विकास भएको बताउँदै)

५. 'झुसिलेबाटै पुतली बन्ने भए पनि झुसिलेलाई पुतली भनिँदैन । झुसिले झुसिले हो, पुतली पुतली नै हो । हामी पुतली बनाएर छोड्छौं । पुतली बनाएपछि पुतली भनौंला । अहिले झुसिले हो माओवादी, पुतली होइन । पछि वामपन्थी बनाउँछौं भनेर उग्रवामपन्थी माओवादीलाई अहिले नै वामपन्थी भन्न मिल्दैन । जुन दिन हामी उसलाई रूपान्तरण गरेर वामपन्थी बनाउन सक्छौं, त्यही दिन वामपन्थी भनौंला । हाललाई माओवादी वामपन्थी होइन ।' (माओवादी वामपन्थी नभई उग्रवामपन्थी भएको तर्क गर्दै)

६. 'दिनमा १० जना एमालेका कार्यकर्ताको टाउका फुटाएका छन्, पाँचजनाका दरमा खुट्टा काट्या छन्, चारजनाका दरमा हात भाँच्या छन् । अनि, यिनलाई कामरेड भनेर हाम्रो शत्रु कहाँ खोज्न जाने ?' (पार्टीको महाधिवेशनअगाडि पार्टी दस्ताबेजमा शत्रु किटानी विषयमा कार्यकर्तासामु बोल्दै)

७. 'गोगो साबुनको विज्ञापनमा भन्छ नि, 'गाईले पनि तिमीलाई लखेट्ने, कुखुराले पनि तिमीलाई नै लखेट्ने' भनेजस्तै एमालेजस्तो पार्टीलाई गाईले पनि लखेट्या छ, कुखुराले पनि लखेट्या छ । कुखुराको पनि ठूलो भाले होइन, चल्लाले लखेट्या छ । एमालेजस्तो पार्टीलाई अरूले गालामा चड्याम्म हान्छ, अनि कस्तो दुख्नेगरी हानेको सहन्नँ है म भन्या छ ।' (माओवादीले एमाले कार्यकर्तामाथि गरेको ज्यादतीलाई पार्टी नेतृत्वले सामान्य वक्तव्यमै टुंग्याउने गरेको बताउँदै)

'अंकको कुरा नगर्ने हो भने माओवादीले प्रमुख पार्टी भनेर ङ्यार्रङुर्र गर्ने, गर्धन फुलाउने काम नगरे हुन्छ । यति जनादेश, उति जनादेश भनेको अंककै कुरा हो, दस्ताबेजको कुरा होइन । बहुमत भनेको संख्या पुर्‍याउने हो, पर्चा पुर्‍याउने होइन'

८. 'पत्रिकामा ल बाबु हो ! अब रंग भर भनेर एउटा कुखुरो बनाइदिएको हुन्छ । लुर्कामा रातो, खुट्टामा खैरो, सिउरमा फुस्रो रंग भरेर पठाउँछन् केटाकेटी । जबजलाई त्यस्तै गर्न खोजिएको छ । केटाकेटीलाई रंग भर भनेर दिइएको चित्रजस्तो होइन जबजको व्याख्या गर्ने तरिका ।' (महाधिवेशनअघि पार्टीको सिद्धान्त जबजलाई तोडमोड गर्न खोजिएको भनाइ राख्दै)

९. 'जबजलाई कहाँ टीको लगाइदिनुपर्छ, कहाँ गाजल लगाइदिनुपर्छ, कहाँ लिपिस्टिक लगाइदिनुपर्छ भनेर बहस गर्ने कि जबजले भनेअनुसार उग्रवामपन्थी र दक्षिणपन्थीविरुद्ध लड्न थाल्ने ?' (पार्टीले अघि सारेको विचार जबजलाई सही प्रयोग नगरी यसको अपव्याख्यातिर ध्यान दिएको बताउँदै)

१०. संविधानसभामा वामपन्थीको दुई तिहाइ बुहमत भनेर त्यसै छाती पिट्दै हिँडेर हुन्छ ? आफ्नो खेतमा खडेरी पर्‍या छ । त्यसमाथि त्यहीँ बाँदर पल्क्या छ । काकाको खेतमा धान फल्यो भनेर खुसी हुने ?
(संविधानसभामा वामपन्थीहरूले ६२ प्रतिशत सिट जितेकालाई उपलब्धि भन्ने झलनाथ खनालको विश्लेषणप्रति टिप्पणी गर्दै)

११. 'हाम्रा पार्टीका महासचिवको हत्या गर्न भीरमा ढुकेर ढुंगा गुल्ट्याउने अपराधीहरूसँग सुमधुर सम्बन्धको वीणा र एकतारे बजाइरहेका छौं ।' (पार्टी महासचिव ईश्वर पोखरेललाई रामेछापमा माओवादीले आक्रमण गरेपछि पनि पार्टी अध्यक्ष झलनाथ खनालको वामपन्थी जुधाएर दक्षिणपन्थीले फाइदा उठाउन खोजेको भन्ने भनाइको जवाफ दिँदै)

१२. 'सिनेमामा हिरोले हिरोइनलाई अँगालो हाल्छ, काखी च्याप्छ, हिरोइन आँसु झार्छे, एक-अर्कालाई केही भयो भने पुर्पुरोमा हात राखेर रुन्छन्, जब सिनेमा सकियो केको लभ पर्नु ! हिरो एकातिर, हिरोइन अर्कैतिर । हामीले जति राम्रो बनाउन खोजे पनि एमाले- माओवादीको सम्बन्ध त्यस्तै भयो । अहिले देखिइहाल्यो नि 'एमालेको नेतृत्वमा सरकार बन्न दिनु भएन प्रभु, बरु तपाइं हुनुस्, दुई तिहाइ हामी मिलाइदिउँला' भनेर गिरिजाबाबुकहाँ लम्पसार परेको ।' (एमाले-माओवादी सम्बन्धबारे टिप्पणी गर्दै)

१३. 'माओवादीको नेतृत्वमा सरकार बनाउन साथ दियौं । सल्लाह गरेर काम गर्न सुझाव दियौं । नउफ्री, नढल्, नकुद्, जमिन हेर् भन्दाभन्दै मानेन । आफ्नै खुट्टामा अल्झेर लड्यो ।' (माओवादी नेतृत्वको सरकार ढलेपछि कार्यकर्ता-भेलामा बोल्दै)

१४. 'हावा भरिएको बेलुनजस्तो आकार मात्र ठूलो भएर हुँदैन, तौल पनि चाहिन्छ । रुक्मांगद नामको छेस्कोले के घोचेको थियो फ्यास्स हावा खुस्कियो ।' (माओवादी आफ्नै उत्ताउलोपनले अप्ठेरोमा परेको र उसको आकार अस्थायी भएको बताउँदै)

१५. 'दुई माना दूध उम्लेर एक पाथी जाने डेक्ची भरिएजस्तै हो माओवादी, दुई मानालाई एक पाथीको भ्रम परेको छ ।'
(संविधानसभाको चुनावपछि माओवादीले अरूलाई हरूवा भनेर अपमान गरेको बताउँदै ।)

१६. 'माओवादीको जनविद्रोह भदौमा आँखा फुटेको गोरुले सधैं हरियो देख्छ भनेजस्तै हो ।'

१७. अठार पुराणको निष्कर्ष 'परोपकारपुण्याय, पापाय परपीडनम्' भने जस्तो एमालेको अहिलेको निष्कर्ष माओवादी सुधार हो । तर, माओवादीलाई सुधार्नु अप्ठ्यारो काम रहेछ । औषधि खुवायो, निल्दैन । एकछिन मुखैमा राख्छ, यताउति हेरेर ओकलिहाल्छ । अनि, हामी के गर्नु त ? (माओवादीलाई रूपान्तरण गर्ने एमालेको प्रयास विफल भएको बताउँदै)

१८. युथफोर्स गठन किन गर्‍यौ भनेको चाहिँ ढोकामा पाले किन राखिस् भने जस्तो हो । चोर आएकोआयै गर्छ, फेरि हतियारधारी चोर आउँछ । पहिला चोर नलाग्दा राख्ने गरेको थिएन । अचाक्ली गरेर झिमिक्क गर्न दिँदैन त के गर्ने ? (पार्टीको सुरक्षार्थ युथफोर्स गठन गरिएको जानकारी दिँदै)

१९. केको वाइसिएल र युथफोर्सको भिडन्त हुन्छ ? 'खुकुरी र टाउकोको मुठभेड' भन्ने ?
(माओवादी र एमालेबीच भिडन्त होइन माओवादीले एकोहोरो आक्रमण गर्ने गरेको बताउँदै)

२०. सरकारमा बस्ने एमालेको धर्म होइन । ब्राह्मणले बिहान उठेर तुलसीमा पानी हाल्छ, गायत्री मन्त्र जप्छ, शुक्रबार-शुक्रबार मुसलमान मस्जिद जान्छ, आइतबार क्रिस्चियन चर्चमा जान्छ भने जस्तो एमाले सत्तामा जान्छ भन्ने पनि हुन्छ ?

२१. म उपप्रधानमन्त्री बन्ने कुरै छैन । केपी ओलीले कुनै कक्षा दोहोर्‍याएर पढेन, पढ्दैन पनि ।

'हावा भरिएको बेलुनजस्तो आकार मात्र ठूलो भएर हुँदैन, तौल पनि चाहिन्छ । रुक्मांगद नामको छेस्कोले के घोचेको थियो फ्यास्स हावा खुस्कियो'
२२. माओवादीलाई (शान्ति-प्रक्रियामा) झुम्केबुलाकी दिउँला, कण्ठेतिलहरी दिउँला भनेर फकाएर ल्याएको होइन ।

२३. अंकको कुरा नगर्ने हो भने माओवादीले प्रमुख पार्टी भनेर ङ्यार्रङुर्र गर्ने, गर्धन फुलाउने काम नगरे हुन्छ । यति जनादेश, उति जनादेश भनेको अंककै कुरा हो, दस्ताबेजको कुरा होइन । बहुमत भनेको संख्या पुर्‍याउने हो, पर्चा पुर्‍याउने होइन ।

२४. बाह्य शक्तिका कुरा माओवादी धेरै बुझ्छन् । धेरै वर्ष बाहिर बसेर संगत गरे, हिमचिम राखे । त्यस्ता कुरा हामी कसरी बुझ्छौं ?(अन्य पार्टी विदेशी इसारामा चलेको माओवादी भनाइप्रति प्रतिक्रिया दिंदै)

२५. गुरिल्लाले फुटबल खेल्ने भएपछि खेलाडीको के काम ? म पनि काठमाडौं फर्केर बुट लगाएर फुटबल खेल्न जान्छु ।
(माओवादीका जनसेनालाई नियमविपरीत खेलकुदमा सहभागी गराएको भन्ने प्रतिक्रिया)

२६. सरकार आफैं अस्पष्ट रहेछ । त्यही भएर सेनापतिसँग स्पष्टीकरण मागेको रहेछ । सेनापतिले स्पष्टीकरण दिए, अब सरकार स्पष्ट भयो । अब यो च्याप्टर सकियो । (सेनापति प्रकरणलाई स्पष्टीकरण मात्रै सोधेर टुंग्याउन सुझाव दिँदै)

२७. एउटा झोला किन्दे भनेर कसैले भन्यो भने झोला किनिदिन सकिन्छ । त्यतिले पुगेन, एउटा हात्ती पनि किनिदे भन्ला । त्यो पनि किनिदिन सकिएला । 'लौ अब त्यो हात्ती यो झोलामा हालिदे' भनेर निहुँ खोज्यो भने के गर्ने ? मधेसको माग भनेको यस्तै हो ।

२८. बाबुराम भट्टराईजी सम्बन्ध चिसियो भनेर आउनुभा'रछ । तताएर जानुभयो ।

(माओवादी नेता बाबुराम भट्टराईसँग आफ्नै निवासमा भेटपछि प्रतिक्रिया दिँदै)

२९. मोहनविक्रम र माओवादी कति जडसूत्रवादी हुन् भने माओ लङ-मार्चमा दक्षिणबाट उत्तरतिर गएका थिए भनेर यी रक्सोलबाट रसुवातिर हिँड्न बेर मान्दैनन् ।

३०. माओवादीले केही नाप्दैन । बाँदरले रूख हल्लाउने मात्रै हो, रूख भाँच्न सक्दैन ।

३१. जबजलाई मदन भण्डारीले बुटवलमा लगेर मात्र परिवर्तन गर्ने भनेका त छैनन् । जडसूत्र होइन क्यारे ! आज अलिकति परिवर्तन गरिदिऊँ, सोमबार अलिकति गरिदिऊँ, भोलि बिहान अलिकता गरिदिउँला भन्ने त हुन्न होला । (पार्टीको सिद्धान्त जबजलाई ८ औं महाधिवेशनबाटै परिमार्जन गर्नुपर्ने भनाइको प्रतिवाद गर्दै)

३२. म कर्कलोमाथि बन्चरो चलाउन चाहन्नँ । (माओवादीका स-साना कुरामा आफूसँग प्रश्न नगर्न अनुरोध गर्दै)

३३. माओवादीको एक्काइसौं शताब्दीको जनवाद भनेको भुमरी हो । भुमरी बाटो होइन, चक्र हो । यो प्रचण्डपथ पनि कुनै निसानामा खसाल्ने होइन, जहाँ खस्यो त्यही निसाना भन्ने हो । हतियार उठाउँदा पनि प्रचण्डपथ, हतियार बिसाउँदा पनि प्रचण्डपथ । के हो यो प्रचण्डपथ ?(माओवादीको प्रचण्डपथलाई जबजसँग तुलना नगर्न अनुरोध गर्दै)

३४. एमालेमा भिडन्त हेर्न खोजेका छन् केहीले । भिडन्त हेर्न खोज्नेहरू केही नपाए साँढे जुधाएर, बट्टाई लडाएर हेर्छन् । (पार्टी भित्रको अन्तर्विरोधलाई बाहिरका शक्तिले उपयोग गर्न नसक्ने बताउँदै)

३५. माधव नेपालले सजिलोमा पनि पार्टी चलाउनुभयो, अप्ठ्यारोमा पनि पार्टी चलाउनुभयो । उहाँलाई (अध्यक्ष पद होइन) धन्यवाद दिनुपर्छ । (पार्टी महाधिवेशनअघि माधव नेपाललाई सम्मानित नेता र आफू अध्यक्ष हुनुपर्ने सांकेतिक तर्क गर्दै)

३६. मसँग एकदमै तर्सेको छ माओवादी । स्वास्थ्य परीक्षण गर्न दिल्ली गएको थिएँ, ऊ यता आत्तिएछ । साथीहरूले सोधे- माओवादी किन आत्तियो ? मैले भनेँ- पुलिस आफ्नै कामले हिँडिरहेको हुन्छ, अपराधीहरू उसलाई देखेर कान्लामुनि हामफाल्छन् । पुलिसलाई चाहिँ थाहै हुन्न । (आफ्नाबारेमा माओवादीले चलाउने गरेको हल्लाका बारे कुरा गर्दै)

३७. माओवादीको सरकार एकातिर बुद्धको अनुहार देखाएर बच्छ, अर्कातिर अंगुलीमाल बनेर तर्साउँछ । (माओवादीभित्र विरोधाभाषी व्यवहार भएको बताउँदै)

३८. माओवादी अरू आठ वर्षमा सकिन्छ । उग्रवामपन्थको आयु २० वर्ष हो, १२ वर्ष त भइसक्यो ।

३९. संविधानको कुनै धारा पेस्की दिइने विषय होइन । (संविधान बन्नुअघि नै आश्वासन बाँड्न नहुने तर्क गर्दै)

४०. पार्टीमा एकता भनेको सबै स्थायी कमिटी सदस्यलाई एकैचोटि रायोको सागसँग हरियो खुर्सानी कुटुक्क टोक्न मन लाग्ने, सबैलाई एकै दिन मस्यौरा खान मन लाग्ने होइन ।
(एकताको अर्थ बहस निषेध नभएको बताउँदै)

४१. नयाँ नेपाल बनाउने भनेको बैतडीको गोलीकाण्ड हो ? विराटनगरको ठेक्कापट्टा हो ? वनफँडानी र रक्तचन्दन हो ? सप्तरीको हत्याकाण्ड हो ? (विधिको शासनबाट मात्रै नयाँ नेपाल बन्ने बताउँदै)
माओवादी अहिले सरकारमा आउँदैन, भदौमा आउँछ । भदौमा मुस्कुराउँदै आउँछ । (एमाले नेतृत्वको सरकारमा माओवादी पनि आउने ठोकुवा गर्दै)

४२. प्रचण्डको सम्बोधनमा आदरणीय बा रे ! आदरणीय आमा रे ! आदरणीय दाजुभाइ, दिदीबहिनी रे ! बाको खुट्टा भाँच्या छ, आमाको टाउको फोर्‍या छ, दाजुभाइको नलीहाड फुटालेको छ । पहिले टाउको फोर्ने अनि कानबाट खुदो खन्याइदिने ? (माओवादीको भनाइ र गराइमा अन्तर रहने गरेको दर्साउँदै)

४३. माओवादी छातेच्याउ मात्रै हो, भदौको ठूलो थोप्ला पानीले नै ठेगान लगाउँछ ।

४४. काठमाडौंमा रिसाएको बिरालो रोल्पामा गएर खाँबो चिथोर्छ भने के गर्न सकिन्छ र ?



झडपमा ३ सभासद् घाइते

गिरिजाप्रसाद कोइराला र प्रधानमन्त्री माधव नेपाल भारतीय एजेन्ट भएको आरोप

फोरमका अध्यक्ष उपेन्द्र यादवले नेपाली कांग्रेसका नेता गिरिजाप्रसाद कोइराला र प्रधानमन्त्री माधव नेपाल भारतीय एजेन्ट भएको आरोप लगाएका छन्। वीरगन्जमा केन्द्रीय कार्यसमितिको बैठक सुरु हुनुअगाडि पत्रकारलाई यादवले आफ्नो पार्टी यिनै दुई नेता मिलेर फोरेको आरोप लगाएका हुन। फोरम फोर्न भारतको हात रहेको हो ? भन्ने पत्रकारको प्रश्नमा यादवले माधव नेपाल र गिरिजाको हात रहेको बताए। 'यी दुवै भारतीय एजेन्ट हुन, अब कसको हात छ तपाई नै बुझ्नुस्'- यादवले भने। 'आफ्नो पार्टीबाट मन्त्री बनाउन नसक्ने प्रधानमन्त्री अर्काको पार्टीबाट उपप्रधानमन्त्री बनाउन हतारिनु फोरम फोर्ने चालमात्र रहेको उनले सुनाए । अध्यक्ष यादवले मंगलबार विजय गच्छादार समूहले निर्वाचन आयोगमा पेश गरेको केन्द्रीय समितिका सदस्यको संख्या अपुरो रहेको दावी गरे। 'पार्टी केन्द्रीय कमिटीले निस्कासन गरेकासमेतको संख्या पुर्याएर बहुमत देखाइएको रहेछ', उनले भने-'त्यसको कुनै मान्यता रहँदैन।' आज वीरगन्जमा हुने केन्द्रीय कार्यसमितिको बैठकमा २५ भन्दा बढी सदस्य जम्मा भइसकेकाले पनि त्यसको औचित्य नरहने उनले सुनाए। बैठकबाट पार्टीका आगामी रणनीति तय गर्ने यादवले सुनाए । 'अब हामी सशक्त प्रतिपक्षको भूमिका निभाउने छौं, उनले भने- बैठकमा सडक आन्दोलनका कार्यक्रमसमेत तय गर्ने छौं। आजको बैठकले गच्छदारलगायतलाई निस्कासन गरेको निर्णय पुन: अनुमोदन गर्न नपर्ने उनले सुनाए ।
मधेशी जनअधिकार फोरमको केन्द्रीय कार्यसमितिको बैठक चल्दै गर्दा सभास्थलअगाडि फोरम कार्यकर्ताबीच एकापसमा झडप भएको छ । अध्यक्ष उपेन्द्र यादवविरुद्ध गच्छादार समूहका कार्यकर्ताले नाराबाजी गरेपछि सुरु भएको झडपमा ३ सभासद् घाइते भएका छन् । दिउसो १२ बजे होटल सम्झनामा कार्यसमितिको बैठक सुरु भएलगत्तै गच्छादार पक्षका कायकर्ताले अध्यक्ष यादवविरुद्ध सडकमा नाराबाजी गरेका थिए। नाराबाजीलगत्तै यादव पक्षधर कार्यकर्ताले पहिल्यै तयार गरेर राखेको बाँसको लठ्ठीले गच्छादार समूहका कायकर्ता खेदेका थिए। यस क्रममा यादव पक्षधर कार्यकर्ताले फोरम सभासद् करिमा बेगम चढेको मोटरसाइकल तोडफोड गरेका थिए। उनलाई सामान्य चोट लागेको छ । पर्सा क्षेत्र नं. १ की फोरम सभासद् करिमा बेगमले नेतृत्व गरको उक्त समूह पुन: भिड बटुलेर बैठकस्थलतर्फ आउन थालेपछि फेरि झडप भएको थियो । पहिल्यैदेखि तयार यादव पक्षधर कार्यकर्ताको पिटाईबाट पर्साकी सभासद् दुर्गादेवी महतोको हातमा गहिरो चोट लागेको छ। त्यस्तै अर्की सभासद् कलावती पासवानलाई यादव पक्षधर महिला कार्यकर्ताले बीच सडकमा लछारपछार पारेका थिए। नजिकै सुरक्षाकर्मी रहे पनि सुरक्षा नपाएको गुनासो उनले गरिन् । उनीहरु दुवैले अध्यक्ष यादवविरुद्ध चर्को नारा लगाएका थिए। घाइते सभासद् दुर्गादेवी साह र कलावती पासवानको वीरगन्जस्थित नारायणी उपक्षेत्रीय अस्पतालमा उपचार हुँदै गरेको पर्सा फोरमका उपाध्यक्ष वीरेन्द्र यादवले जानकारी दिए ।