बाराक ओबामाका सय दिन यसरी बिते

संयुक्त राज्य अमेरिकाका राष्ट्रपति बाराक ओबामाले राष्ट्रपतिको कार्यभार सम्हालेको बुधबार सय दिन पूरा भएको छ । उनको हनिमुन अवधिलाई पूर्वअमेरिकी राष्ट्रपति प|mयांक्लिन डी रुजभेल्टसँग तुलना गरिएको छ । रुजभेल्टको शासनकालयता सय दिनको अवधिमा सबैभन्दा बढी सम्झौता र घोषणापत्रमा हस्ताक्षर गर्ने राष्ट्रपति ओबामा बनेको युनिभर्सिटी अफ क्यालिफोर्नियाको अमेरिकन प्रेसिडेन्सी प्रोजेक्टको तथ्यांकले देखाएको छ । यस अवधिमा सबैभन्दा बढी समय विदेशमा बिताउनेमा पनि ओबामाले आफूअघिका अन्य ४३ अमेरिकी राष्ट्रपतिलाई उछिनेका छन् । प्राइम टाइम -मुख्य समय) मा पत्रकार सम्मेलन गर्नमा पनि ओबामा अब्बल दरिए । यसअघिका राष्ट्रपति जर्ज डब्लु बुसले आफ्नो चारवर्षे पहिलो कार्यकालमा गरेजतिको पत्रकार सम्मेलन ओबामाले एक सय दिनमा गरे । पूर्वराष्ट्रपति बिल क्लिन्टन र ह्यारी ट्रुम्यानले मात्रै हनिमुन अवधिमा धेरै पत्रकार सम्मेलन गरेका थिए । ओबामाले यसै अवधिमा प्रगतिशील घरेलु एजेन्डालाई चाँडोभन्दा चाँडो कार्यान्वयन गर्न लगाए । यस एजेन्डाभित्र महिलाका लागि समान कामका लागि समान तलब, स्वास्थ्य सेवा विस्तार आदि कानुन रहेका छन् ।
यसका साथै आर्थिक मन्दीबाट अमेरिकालाई बचाउन ओबामाले सात सय ८७ विलियन डलरको प्याकेज पेस गरे । हनिमुन अवधिमा नै कंग्रेसको दुवै सदनले ३.६ टि्रलियन डलरको बजेट योजना पास गर्‍यो । त्यसमध्ये दुई सय ७५ विलियन डलर घर लिलामी रोक्न र सय बिलियन डलर टाट पल्टन लागेका बैंक जोगाउन प्रयोग गरिनेछ । यी सय दिनमा ओबामाले अमेरिकाको छवि सुधार्नतर्फ पनि पहल गरे । उनले क्युबा, इरान तथा भेनेजुएलासँगको सम्बन्ध सुधार्न कदम चाले । भेनेजुएलाका राष्ट्रपति ह्युगो चाभेजसँग हात मिलाउँदा कयौं रिपब्लिकन नेताले ओबामाको आलोचनासमेत गरे । बुस प्रशासनका वेला कुख्याति कमाएको ग्वान्टानामोवे जेललाई एक वर्षमा बन्द गर्ने आदेश ओबामाले दिए ।