राजाको टीका लगाएकाहरु न्यायाधीश भएकाले परिवर्तन हुन नसकेको आरोप

एकीकृत नेकपा माओवादीका वरिष्ठ नेता समेत रहेका अर्थमन्त्री डा.बाबुराम भट्टराईले गणतन्त्रको विकासमा न्यायालय वाधक भइरहेको आरोप लगाएका छन् । उनले पुरानै सोचबाट न्यायाधीशहरु ग्रस्त भएको बताए । उनले भने, "न्यायाधीशहरुबाट गणतन्त्रको निर्णय उल्टाउने काम भएको छ, यस्तै हो भने देशमा दुभाग्यपूर्ण अवस्था आउछ ।" न्यायाधीशहरु राजाको टीका लगाएकाहरु भएकाले परिवर्तन हुन नसकेको उनले बताए । अग्रगामी परिवर्तनका लागि न्यायालयबाट अवारोध भइरहेको उनको आरोप थियो । सर्वोच्च अदालतले नेपाली सेनाका आठ जर्नेललाई अवकाश दिने सरकारी निर्णय तत्काललाई रोक्न अन्तरिम आदेश जारी गरेपछि भट्टराईको न्यायालयप्रति कडा अभिव्यक्ति आएको हो ।