बहालवाला मन्त्री खुस्किए पछी... : "सबै नागरिकको हातमा बन्दुक हुनुपर्ने माओवादीको आधिकारिक धारणा"

मन्त्री बौलाए भनौ भने मानसिक अस्पताल् लगिएको, ऊपचार् गरिएको छैन, नभनौ भने कुरा सुन्दा एक बहालवाला मन्त्रीले यस्ता कुरा कसरी भन्न सक्छ ? कतै हामी आँफै त बौलाइेन जस्तो लाग्छ । संस्कृति तथा राज्य पुनर्संरचना मन्त्री गोपाल किराँतीले सबै नागरिकको हातमा बन्दुक हुनुपर्ने माओवादीको आधिकारिक धारणा भएको दाबी गरेका छन् । पत्रकार महासंघ दाङ शाखाले आइतबार घोराहीमा गरेको पत्रकार भेटमा बोल्दै मन्त्री किराँतीले भने, 'राज्य पुनर्संरचना गर्न बन्दुकको महत्वपूर्ण भूमिका हुन्छ ।' यस विषयमा पार्टीभित्र छलफल पनि भएको छ, उनी भन्छन्, 'यो मेरोमात्रै विचार होइन पार्टीको आधिकारिक धारणा हो ।' राज्यलाई जबसम्म बन्दुक आवश्यक पर्छ तबसम्म जनताले बोक्नैपर्ने बताउँदै मन्त्री किराँतीले भने, 'बन्दुकले मात्र वास्तविक लोकतन्त्र, शान्ति र मानव अधिकार सम्भव हुन्छ ।' बन्दुक नबोक्दासम्म अधिकार प्राप्त नहुने भन्दै मुक्त कमैया, हलियालगायतका सबै आन्दोलनकारीलाई उनले बन्दुक बोक्न आह्वान गरे । बन्दुकको राज हटाउन बन्दुक बोक्न जरुरी भएको उल्लेख गर्दै मन्त्री किराँतीले भने, 'मुक्त कमैया, हलिया सबैले बन्दुक बोक्नुहोस् नत्र तपाईंहरूको पुनर्स्थापना हुन सक्दैन । बन्दुक नबोकी अधिकार पाएको इतिहास कतै छैन ।' अब प्रत्येक नागरिकलाई बन्दुक प्रदान गरी राज्यले नागरिकलाई सेना बनाउनुपर्ने उनको भनाइ थियो ।
वृद्धवृद्धा र बालबालिकाबाहेक सबै नागरिकको हातमा बन्दुक नभएसम्म देशमा जनताको शासन स्थापना भएको मान्न नसकिने धारणा मन्त्रीले राखे । नयाँ संविधानमा सबैको हातमा बन्दुक हुने व्यवस्था गरिने बताउँदै उनले जनसेना र सरकारी सेनाको हतियार जनताको सुरक्षाका लागि पर्याप्त नहुने दाबी गरे । उनले राज्यको, २५ दलको र २ करोड ५० लाख जनताको गरी ३ खाले कानुनभित्र रहेर अहिले सरकारले काम गर्नुपरेको बताए । उनले यी तीन कानुनको अन्त्य नहुँदासम्म राम्रोसँग काम गर्न नसकिने धारणा राखे ।
'खामलाई पुरस्कृत गरिनुले हत्यामा माओवादी उच्च नेतृत्वको संलग्नता रहेको पुष्टि हुन्छ'

व्यापारी रामहरि श्रेष्ठको हत्यामा संलग्न भएको आरोप लागेका कालिबहादुर खाम 'विविध'लाई माओवादीले केन्द्रीय सदस्य बनाएकोमा श्रेष्ठका परिवारले विरोध जनाएका छन् । रामहरिकी पत्नी रमिला र दाजु श्यामकाजीले सोमबार विज्ञप्ती जारी गरी खामलाई केन्द्रीय सदस्यबाट निकालेर कडा कारवाही गर्न माग गरेका छन् । विज्ञप्तीमा कोटेश्वर नागरिक समाज संघर्ष समिति र प्रधानमन्त्री पुष्पकमल दाहालबीच गत जेठ १४ गते भएको सम्झौतामा खामलाई मुख्य दोषी भनेर किटान गरिएको स्मरण गराउँदै केन्द्रीय सदस्यमा नियुक्त गर्नु उक्त सम्झौता विपरीत भएको जनाइएको छ । 'खामलाई पुरस्कृत गरिनुले हत्यामा माओवादी उच्च नेतृत्वको संलग्नता रहेको पुष्टि हुन्छ' भन्दै कारवाही नभए आन्दोलनमा उत्रने चेतावनी दिइएको छ ।



श्रृंखलाबद्ध ३ वटा शक्तिशाली बम बिष्फोट

सप्तरी सदरमुकाम राजबिराजमा सोमवार साँझ श्रृंखलाबद्ध रुपमा ३ वटा शक्तिशाली बम बिष्फोट भएको छ । राजबिराज- १ स्थित हटियामा साझ ६:२५ मा पहिलो बम बिष्फोट भएको थियो । त्यसको ३ मिनेट पछि वडा नं ३ स्थित शिवशक्ति इलेक्टि्रकल्स पसलमा दोश्रो र त्यसको केहि छिनमै वडा नं ७ स्थित जिल्ला अदालत पछाडी तेश्रो बम बिष्फोट भएको् थियो । ईलेक्टि्रकल्स पसलमा भएको सकेट बम बिष्फोटको छर्रा लागि १२ वर्षीया बालिका पुजा दास गम्भिर घाईते छिन् । बिष्फोटबाट पसलका सिसा तथा सामानहरु नष्ट भई करिव ४ लाख बराबरको क्षति भएको प्रहरीले प्रारम्भिक अनुमान गरको छ ।
अन्य बिष्फोटहरुबाट भने क्षति नभएको प्रहरीले जनाएको छ । यता बिष्फोटको महान मधेस जनक्रान्ति पार्टीका नगर ईन्चार्ज बताउने परबानाले जिम्मेवारी लिएको छ ।